Dawa pyllait ki lehnoh Garo

Shillong, 27 Lber:
Saw tylli ki kynhun seng lehnoh bapher bapher ha Ri-Lum Garo ki la dawa na ka sorkar ba ka dei ban pyllait noh ia u dkhot jong ka A’chik National Liberation Central Army (ANLCA) u ba la wan pyndem ialade ha u Superitendent of Police ka East Khasi Hills district. Ki kynhun lehnoh ba kynthup ia ka United A’chik Liberation Army (UALA), Liberation Achik Elite Force (LAEF), A’chik National Liberation Central Army (ANLCA) bad ka A’chik Sangma An’pachakgipa Kook (ASAK) ki la dawa ba ka sorkar ka dei ban pyllait noh ia u Charles D shira hapoh ka laisngi, lym kumta ki la byrngem ban khan glut ha Garo Hills. Lah ban pynkynmaw ba u Charles D Shira u la wan pyndem ha khmat u SP ka East Khasi Hills ha ka 4 tarik mynta u bnai, ryngkat bad ki tiar ialeh jong u, ka AK -47 bad ki kuli. Hynrei kitei ki seng lehnoh ki la kam ba watla u Shira u la wan pyndem, hynrei ki pulit ki la kem bad pynshitom bein ia u.