U paidlang ka thain shatei lam mihngi, un iakhun biang, lada thmu pynlong ain ia ka CAB, ong U Zoramthanga

Aizawl: U Zoramthanga, myntri rangbah ka Mizoram, ula kren shai hynnin ka sngi, ba lada ka sorkar India, kan wan rah biang ia ka ain  Citizenship (Amendment) Bill, 2016  lane ka CAB nangne shakhmat, kumta u paidlang jong ka thain shatei lam mihngi, ba kynthup ia ki seng sain pyrthei, ia ki sorkar Jylla bad u paidlang baroh lang, kin ia khun tyngeh ban nym ailad ia kaba kum katei ka ain. Ia kitei ki kyntien, la kren da U Zoramthanga, ha ka jingialang ha Aizawl, hynnin ka sngi.

U Zoramthanga, uba dei U President jong ka seng  Mizo National Front (MNF), u wer ia ki sengbhalang, ki seng niam bad ki seng sain pyrthei, ba kin khanglad, na ka bynta ban pyntreikam ia katei ka ain CAB ha Parliament. Ula ong shuh shuh ba ia ka CAB, ym shym la lah ban wan rah ha Rajya Sabbha, namar u paidlang ka thain shatei lam mihngi, u ia khun pyrshah.

Kawei pat ka khubor ka iathuh ba ka seng thymmai ha Tripura, kaba la tip kum ka  Movement Against Citizenship (Amendment) Bill (MACAB), kan pynlong ia ka jingialang paidbah ha ka Lah Sngi U Blei ha Agartala.

Namar ba ka por trei kam jong ka Lok Sabha, kan kut noh, kumta katei ka ain, kan kut por noh ha ka 3tarik Jylliew 2019, namar ba ym lah ban pynlong ain ha dorbar Rajya Sabbha.