Ka jing pynhiar kput ki pulit Assam ha Langpih

Ha u snem 2010, ki la don 4ngut ki rangbah Khasi, kiba la iap ei ha Langpih bad da ki phew ngut kiwei pat ki la mynsaw.
Mynta hadien 9snem, sa 28ngut kiwei pat ki la mynsaw bad katei ruh ka dei hi ha ki pulit Assam bad katei ka pyni, ba ka thain Langpih, kam dei shuh ka jaka kaba suk ba shngain ia ki nongshong shnong hangtei, namar ka la dei ka jaka thombor jong ka Assam bad kaba ka sorkar Assam, ka la buh beit da ki pulit lem bad ki khar Nepali, kiba dei ban bom briew, ban pyndik ia ki riew paidbah bad ban pynher syrngiew ia ki nongshong shnong sha katei hi ka thain baroh kawei.
Kumta katei kam dei shuh ka jingjia, kaba shu jia, hynrei, la imat, kumba ka don ia ka thong, ban iuhroit ia ka hok longbriew manbriew jong ki riew paidbah kiba shong hangtei ha khappud.
Ka sobjek jong ka kampud hapdeng ka Assam bad ka Meghalaya, kam dei satia kaba rit bad kaba suk ban iakren, hynrei ka jingshisha, ka long tang kawei bad kata ka long ba ka histori, ka batai ba ki Khasi, ki dei ki trai shnong kulong kumah ha katei ka khappud bad lada ka histori, ka long kumta, kumno kan mih pat ka jing iatan tyllai, da ka bor ban pyni ba ki Khasi, ki dei ki Khasi, lane ba ki dei ki poiwir ha katei ka thain bad lada ka long kumta, ka pyni ba ka la dei ka jingthok kaba pyllein bad ka jingthombor ia ka jinglong trai jong u paid Khasi, uba shong ha khappud.
Ka Assam, ka dei ban sngewthuh ba ki bynta jong ka Ri Khasi Jaintia, ki la hap lypa hapoh katei ka Jylla, ha shwa jong ka jingmih ka Jylla Meghalaya, hynrei pat kam mut satia ba ka jinglong trai shnong jong ki Khasi, ha la ki jong ki jaka puta, ba kan wan batai stad da katei ka Jylla, kaba markhap, namar ba u nong Langpih, un iai long hi u nong Langpih, wat lada phin siat da ki spah tylli ki suloi ruh.
Ka jingmih jong ki sorkar, lada dei ha ka Ri India lane lada dei ha ki sorkar Jylla, ka dei ban nang pynkhlain ia ka riti dustur, ia ka jinglong jingman jong kiei kiei kiba la don lypa bad lada phi pynkylla ia ka Langpih sha Assam lane sha Meghalaya, hynrei phim lah ban pyn kylla ia ka jinglong trai shnong jong ki briew bad ia ka rukom im jongki, kaba ki la ju im ha ki spah snem mynshwa. [rms]