Jied MP ia u briew ym ia ka party, ong ka RBYDSO

Shillong, 26 Lber:
Ka RBYDSO ka kyrpad ia ki paidbah baroh ba ki dei ban da pynshong nongrim bha haba jied ia u Nongmihkhmat ha kane ka elekshon MP mynta, ym ba ngin peit ia kano kano ka party.
U Bah Dibishon Malai, President kane ka Seng u la kyntu ruh ia ki paidbah ba kin jied ia u Nongmihkhmat uba don ka jingkyrmen ruh na ka bynta ka jingbha ka lawei jong ka jaidbynriew.
U bah Dibison u la ong ruh, “ngi donkam ban da puson bad pyrkhad bha haba ngi jied ia ki nongmihkhmat kiba lah ban iasaid ia ki jingeh kiba ap na ka bynta bad dei ban jied ia u nongmih khmat da ka mon ba laitluid.”
“Ngi donkam ia u Nongmihkhmat uba lah ban thaw ia ki lad pyniohkam ia ki samla namar ka jingkyrduh ban iohkam iohjam bad uba kren pyrshah ia ka jingjyllei palat jong ka bamsap,” la ong biang une u nong ialam.
“Ngi donkam ruh ia u Nongmihkhmat uba don ka thong ban weng ia ka jingduk, ka jingkyrduh bad ka jingsah dien, namar kine ki dei kiba pyntroin ia ka ri bad ka jaidbynriew” la pynkut u bah Malai.