Dawa panmap u bah Process na ka BJP halor ka CAB

Shillong: U MLA ka Congress na Mawlai u bah Process T Sawkmie ula dawa panmap na ka BJP halor ka jingwanrah jongka ia ka Citizenship Amendment Bill (CAB) 2016.
Kane ka jingdawa panmap u bah Process ka long hadien ba ka CAB kaba la iakhun dohiap ka BJP ban pynlong ain, ka la sahkuut ha pulom noh ha Rajya Sabha hadien ba ki MP liangpyrshah ki la pyrshah jur ia kane ka Bill kynthup ki paralok kiba don lang bad ka BJP ha ka NDA.
“Ka BJP ka dei ban panmap ia ki paidbah ka dong mihngi ban ong ba ka bakla namar ba kane ka Bill ka long pyrshah ia ka dong mihngi, kiba rit paid”, la ong u bah Process haba kren mynhynnin ka sngi.
Ha kajuh ka por, u la kyntu ia ki paidbah ka dong mihngi bad ka jylla Meghalaya ba ki dei ban kynmaw ba kane ka Bill kam pat kut lada wan biang ka BJP ha ka bor. “Ym dei ban pynjop ia ka BJP bad dei ban pynliem beit ia ka BJP namar ba lada kan wan biang ha ka bor, kan long ka jingma”, u la ong.
U la pynpaw ia ka jingsngew kmen, ba ka jingtreilang ki MP liangpyrshah ka Rajya Sabha, ki la lah ban ieng pyrshah ia kane ka Bill.
“Ngi dei ban ai khublei ia ki MP kiba ieng pyrshah ia kane ka Bill, ia ki seng bhalang kiba don ha kane ka thain kiba la trei shitom ban pyrshah ia kane ka Bill”, la ong u bah Process.
Ha kawei ka liang, ki nongialam seng sain pyrthei bapher bapher kila pynpaw ba kane ka jingshah rem ka CAB ha Rajya Sabha, ka dei ka jingjop jong ki paidbah.
U president ka NPP, u WR Kharlukhi u la ai nguh ia u Blei ba kane ka Bill ka la pulom hynrei te ka dong mihngi ka la kem ding lada urlong kane ka Bill. U Dr Kharlukhi u la ai khublei ia ki nongialam jong ki seng sain pyrthei bapher bapher kiba pyrshah tyngeh ia kane ka Bill.
Ha kajuh ka por, u MLA shimet, u bah Lambor Malngiang u la pynpaw ia ka jingsngew kmen halor ka jingpulom kane ka Bill bad kumjuh u nongialam ka PDF u bah Hamletson Dohling, kiba la pynpaw ba kane ka dei ka lynti jong ka jingiatylli ki paidbah ka dong mihngi.