900 akar, shim jubor ka Sorkar ha Saitsohpen, ong U MDC

Shillong, 26 Lber:
U CEM ka KHADC u Bah Ardent M Basaiaw moit u la ong ba nangne shakhmat, kino kino ki kompeni ne ki kynhun ne ki riew shimet kiba dei nabar, kim lah ban wan seng kam seng jam hapoh u pud u sam ka KHADC khlem da ioh ia ka jingbit na ka Council.
“Ngim nym ailad ba ka sorkar jylla kan knieh ia ka bor bad ka iktiar jong ngi”, la ong u Bah Basa iawmoit uba kdew ba bun ki kompeni bad kiwei ki tnad kiba nabar, ki wan ban leh ia ki kam ha kane ka jylla, tang da kaba ioh ia ka NOC na ka sorkar jylla khlem da iaid na ka District Council kaba dei ka nongbat bad ka ri ia ka khyndew ka shyiap ka jaitbynriew.
U Bah Basaiawmoit u la ong ia kane haba jubab ia ka motion halor ka kamram ka district council ia ka

jingshim jaka jong ki paidbah da u MDC ka Sohra u Bah Donevan Wanlang.
U Bah Basaiawmoit u la ong ba kumba long haduh mynta, ka sorkar kam khien snep ia ka district council bad bun ki karkhana, ki kompeni ki la iaid lait ban wan sha ka Council ba pan ia ka NOC. “Ka sorkar kam lah ban kurup ne shim ia ki jaka jong ki paidbah khlem da ioh ia ka jingmynjur na ka district council”, la ong u CEM.
Shwa ia kane, u MDC ka Sohra u la pynpaw ia ka jingsngew khia ia ka jingshim jaka ka sorkar jylla khlem da sngap ia ka jingujor jong ki paidbah ha Saitsohpen ha Sohra.
U la ong ba ka sorkar jylla ka la shim ia ka jaka ha ka jingheh kaba 900 akar ka khyndew ha Saitsohpen ban buh ia ka National Institute of Technology (NIT).
“La iathuh ia nga ba ka sorkar kam shym la iaid lyngba na ka Council halor kane”, la ong u Bah Wanlang.
Ia kane ka phang la kyrshan ruh da u MDC ka Laitumkhrah u Bah Antonio N War uba pynsngew ruh ia ka jingeh jong ki paidbah ha ka thain shnat Raid Tynring bad Raid Mawpdang namar ka jingshim jaka ka sorkar ban thaw ia ka New Shillong Township.
“Nga sngew tieng ba ki paidbah nongrep kin shah beh shnong na kane ka jingshim jaka ka sorkar”, la ong u Bah War bad kyntu ia ka district council ba kan tuklar ia kane ka kam.