Sha Delhi leit iakynduh u president ka HFU ia u heh ka AIKSCC halor ki kam nongrep

Delhi: U president jong ka Hill Farmer Union (HFU) bah Commander Shangpliang ula leit ban iakynduh ha Delhi ia u VM Singh uba dei u Convenor jong ka All India Kisan Sangharsh Coordination Committee (AIKSCC) kaba dei ka seng synrop jong ki nongrep ha ka ri India baroh kawei.

Ka seng AIKSCC ka ieng ha ka nongrim ban dawa na ka sorkar India ban pyntreikam ia ka Minimum Support Price (MSP) lane ban buh dor ia ki mar rep jong ki nongrep ha ka ri India baroh kawei bad kumjuh ruh ban mab noh ia ka ram jong ki nongrep ha ka ri.

Kumta ha kane ka jingiakynduh jong u bah Commander Shangpliang uba dei u nongialam jong ka Hill Farmer Union (HFU) kaba dei ka seng kaba trei na ka bynta ki nongrep ha ka jylla u la ai ka jingkyrshan kaba radbah ia kane ka seng AIKSCC hapoh ka jingialam jong u VM Singh kaba iakhih ia kajuh ka ishu kaba donkam bha.

U bah Commander Shangpliang u la iathuh ba ka HFU ka dawa ban mab noh ia ka ram jong ki nongrep bad kumjuh ruh ban pyntreikam ia ka MSP namar ka jingshah khniot dor ia ki mar ki nongrep. Kumta ula ong ba ka HFU kan iatreilang bad kane ka seng jong u VM Singh ban dawa na ka sorkar ia ka jingpyntreikam ia kitei ki mat na ka bynta ka jingmyntoi jong ki nongrep.