|
Da u Bah Philip Marweiñ
Kane ka dei ka por ilekshon bad ki paidbah ki ia-ong baroh baroh ba ki party ki pynieng ia la ki jong ki jong ki Kandidet bad pynkaweh la ki lama lama hynrei shano bad balei jah jlang tang ka BJP na ka lympung iakhun? Kam dei kaba suk ia nga ban jubab ia kane ka jingkylli jong ki paidbah ka jylla. Lehse tang ki Nongialam bad ki nongkitkam jong ka party BJP ki lah ban jubab ia kane. La jar katta ruh ngan pyrshang ban pashat katto katne ki mat harum kiba lehse ki lah ban ai jingshai halor ka party BJP ha kane ka jylla.
Ka seng BJP ka la kynjoh kumba 28 snem ha kane ka jylla naduh ba ka la wan buh mawnongrim ha kane ka jylla ha u bnai Iaiong, 1991. Ha ka jingiaid lynti jong ka ha kine ki 28 snem ka la iakynduh shibun ki khohruh khohram bad ki diengpyngkiang. Ka jingeh kaba khraw tam jong kane ka party ka dei ba kam ioh ia ki briew kiba tbit, kiba tiengblei, kiba lah ban shaniah bad kiba lait na ka jingshah pynbud nam bad kumjuh ruh, kam lah ban khring lane tong briew namar kam ioh ia ki nongialam, ki nongkitkam kiba stad bad kiba shemphang bad kiba shisha. Haduh mynta ruh kane ka party kam pat don shisha ia ki nongialam kiba shisha bad kiba tbit ban pyniar ia ki thapniang jong ka.
Kane ka party ka la ioh haduh 7 ngut ki President. U president u ba nyngkong eh u dei u Bah Moina Sing Phyllut, nangta u Bah Aiontis Roy Kharphuli, u Dr. Werlok Kharshiing, U Bah A. L Hek, u Bah H.S Syiemlieh, u Bah Khlur Sing Lyngdoh bad mynta u Bah Shibun Lyngdoh. Uno napdeng kine ki Nongialam ba phi ki paidbah jong ka jylla phi lah ban ong ba shisha u la long lane ki la long ki nongialam kiba shyrkhei bad kiba tbit da shisha. Hynrei, la katta ruh kane ka party ka la lah ban pynjop haduh lai ngut ki MLA ha ka snem 1998. Kine ki dei u Bah Thranghok Ryngad, u Bah A.L Hek bad u N.N Simchang. Hynrei ha ka snem 2003 la jop tang ar ngut, u Bah Thranghok Ryngad bad u Bah A.L Hek bad hadien ka jingkhlad noh jong u Bah Thranghok la jop bujli noh da i kurim jong u Bah Thranghok, Kong Jopsibon Phanbuh. Hadien kata la jop tang u Bah A.L Hek, hynrei ma u ruh u la phet noh na ka BJP bad shipor kane ka Party kam don MLA shuh. Dei tad ha ka snem 2018 ba la ioh biang sa 2 ngut ki MLA, u Bah A.L Hek bad u Bah Sanbor Shullai. Wat kine ruh ngim tip la kin neh ha kane ka party ne kumno haba ki jinglong jingman ha ka sain hima sima ha ka Ri bad ka jylla ki kylla stet.
Nalor katei ka daw ba la kdew haneng ki don sa kiwei pat ki daw ba balei ka party kam roi lane kam lah ban pyniar ia ki thapniang jong ka. Sa kawei pat ka daw kaba kongsan kaba khanglad ia ka jingroi jong kane ka party ka dei namar kam don Unit ha manla ki shnong. Hooid, ka don kita ki District Mandal tang ha ki katto katne ki District, ym ha baroh. Kam don Mandal lane Unit wat ha ki Block ruh, yn nai iakren ia ki unit ha ki shnong. Ngim tip, ki leh aiu kine ki nongkitkam jong ka party naduh u President, Vice-President, u General Secretary, ki secretary, ki organising secretary bad kiwei kiwei ki nongkitkam jong ka party. Ka jingkhlain lane ka jingtlot jong ka party ka shong ha ka jingtbit jong ki nongkitkam, ki nongtrei party bad ki nongkyrshan. Ban jop ilekshon la ka long ha ka MP, MLA ne MDC ka shong ha ka jingkhlain ki Unit ha ki shnong, ha ki Block bad ha ki District kiba lah ban tong briew shibun, namar, ha ka ilekshon hi ban jop ka shong ha ka jingioh tong briew bun paid. Ha kane ka bynta ka BJP ka tlot palat. Te khnang ba kane ka party kan roi bad iar ka hab ban shim ia ka synjam kaba tyngeh bad kata ka long ban ialeh tyngeh ban pynthymmai ia ki nongkitkam ha ka jylla baroh kawei, ban ialeh tyngeh ban seng ki Mandal bad ki Unit ha manla ki shnong ki thaw ban ioh nongtrei party naduh tynrai. Ka dei ban kloi ban pynlut shibun ban ioh ia ki briew kiba tbit. Kat shaba iohi ba ki don ki sap nongialam ka dei ban tong ia ki sha lade bad kane ka long kaba remdor haduh katta katta hynrei, dei ban leh ia kane ka jingpynrung dkhot da ka jingjai jai, ka jingieid bad ka jingtipbriew tipblei, ym ban shu shaniah than tang ha ka peisa.
Ka BJP ka la pynlut peisa la jhor bha ha kane ka ilekshon MLA ba la lah ha ka snem 2018, ngim tip katno klur, tang kito kiba tip hapoh ka party ki tip hynrei uei u soh na kane ka jingpynlut ? Jop tang 2 ngut ki MLA, kata ruh ym dei na ka bor jong ka party BJP hynrei ka dei na ka jinglah bad ka jingtbit shimet jong ki kyrtong, u Bah A.L Hek bad u Bah Sanbor. Kine, lada ki iakhun na kano kano ka party lane ki ialeh Independent ruh ki jop hi, namar ban ialeh pyrshah ia u Bah Hek na Pynthorumkhrah bad ia u Bah Sanbor na South Shillong, ka long kaba jwat. Wat ha kane ka ilekshon MP ka ban sa long ha u bnai Iaiong lane Jymmang ruh. Ka BJP lada ka pynieng kandidet ruh kan shem jingeh ban jop da lei lei, la ha Shillong seat lane ha Tura ruh namar kam pat suhthied ei ei ruh ha ki shnong ki thaw, ha ki Block bad ki District ruh bad khamtam mynta la wan sa kane ka ka CAB bad kiwei kiwei ki bynta ki bym itynnat ha kylleng ka Ri India. Ka daw ba balei jah ka BJP bad ki lama jong ka ha kane ka MDC ilekshon kaba mynta ka Khasi bad Jaintia Hills ruh ka dei na kine ki daw ba la kdew haphrang.
Ha kane ilekshon MP ka ban sa wan ha Ri India ka ban sa long shen ha u bnai Iaiong lane Jymmang, ka BJP hi kan dang leh bha ha bun tylli ki jylla, lait noh tang ha kane ka thain North East. Lait sa tang kumno re, hynrei lada bakla ki nongialeh pyrshah, ka BJP kan dang iakhun ban wan biang ha ka bor ha Delhi.
|
Phi don ban ong eiei?