Pynjari korphiw, kaba khlem pynkut por ha ki bynta jong ka Manipur

Imphal: La pynjari korphiw kaba khlem pynkut por, ha Imphal West bad East District, mynta ka sngi, namar ba ka jing ia khih ban pyrshah ia ka  Citizenship (Amendment) Bill, 2016 (CAB), ka dang iai bteng haduh mynta ka sngi.

U N Praveen Singh, Deputy Commissioner ka Imphal West ula pynmih ia kane ka hukum hynnin ka miet, ha ryngkat ka Chitra Devi, Deputy Commissioner ka Imphal East. Ki seng bapher, ki la pynlong ia ka jing iakhih paidbah, kaba 36 kynta, kaba sdang naduh ka miet jong ka Sngi U Blei, ha kaba ki dukan bad ka trei ka ktah, ka la khang lut ha kitei ki ar tylli ki District.

Hadien ba la pynjari korphiw, ki pulit ki iaid sha kylleng ki jaka ban maham ia ki paidbah, ba kim dei ban mih shabar na la ki iing.