Kem ki pulit ia ka trok kit dewiong beain

Nongstoiñ: Ki pulit ka West Khasi Hills, hadien ba ki la ioh ia ka jingtip kaba tikna halor ka jingdon jong ki katto katne ki trok kiba kit dewiong beain ha ka thaiñ, kumta na ka liang jong ki pulit ki la pynlong ia ka jingpeitngor bha ha man ki lad bad ki surok hapoh ka thaiñ hi baroh kawei.
Ka tyllong khubor ba la ioh lum, ka iathuh ba ha ka miet Sngi Saitjain, ha kapor kumba 10.53 PM, ki pulit ki la ioh jingtip ba don ka trok kaba la suba ba ka kit dewiong beain bad kaba dang iaid ruh na ka surok jong ka thain Pyndengrei Nongstoiñ bad hadien katei ki pulit kila ioh ban bat noh ia katei ka trok na Umjaru.
Shuh shuh ka tyllong khubor ka iathuh ruh ba katei ka trok kaba la ioh ban bat noh da ki pulit kadei kaba don ia u registration number ML 06-8756 bala niah da u Andrias Thyrniang 39 snem na ka shnong Diskiang WKHD ha ryngkat u nongbud u bala tip kum u Iohbor Puwein 18 snem na Nongriangkhon kaba hap hapoh ka Shahlang Police Station.
Hadien ba ki pulit ki la dep ban pynlong ia ka jingtohkit kaba bniah, ki la kurup noh ia katei ka trok bad kumjuh la kem noh ia u nongniah bad u nongbud ha kaba ki la rejistar ruh ia ka case katkum ka case number 07(2)19 U/S 188/34 bad ka jingtohkit halor katei ka jingjia ka dang iaid shakhmat.