Pynkhreh sa ka NPP, ban iakhun MP na Shillong

Shillong:Ka jingialang jong ka National Peoples Party (NPP), ka la rai hynnin ka sngi, ba kan pyniakhun ha baroh 24 tylli ki Constituency jong ka thain shatei mihngi ha ka elekshon Lok Sabbha ka ban wan bad lada ka long kumta, ka paw shai ba katei ka seng, kan sei kandidet, na bynta ka elekshon Lok Sabbha ha Shillong Constituency ruh kumjuh.
Ha ka jingiakren bad ki kotkhubor hynnin ka sngi, U Conrad, ula pynsngew ba ka rai jong ka jingialang, ka long ban iakhun ha baroh ki Constituency jong ka thain shatei lam mihngi bad kumta, u pynsngew ba ka seng, ka don jingthmu ban iakhun ia ka Shillong Seat ruh, wat la ka jing iakren, ka dang iaid, na ka bynta ban ia sngewthuh jingmut lang hapdeng ki paralok kiba don lang ha kane ka sorkar Meghalaya Democratic Alliance (MDA).
Na ka liang jong ka seng UDP, ka la iaid shakhmat mynta, na ka bynta ban pyn thikna ba U bah Jemino Mawthoh, uba dei U General Secretary jong katei ka seng, un iakhun beit ia ka Shillong Seat, kum u kandidet jong ka seng UDP, ha kaba yn mynjur lang jong ka kynhun sorkar MDA, hynrei kat haduh mynta ka rai kaba shai, kam pat don haduh mynta.