230ngut ki kandidet, ki ban iakhun ia ki elekshon ha KHADC & JHADC

Shillong: Ki don 230 ngut ki kandidet, kiba mih ban iakhun ia ka elekshon sha ki ar tylli ki District Council ha ka 27tarik Rymphang 2019. Na kitei ki don 131 ngut ki ban iakhun ha ka elekshon ha Khasi District Council bad 7ngut na kitei ki dei ki kynthei. Ka Congress, ka don ia ki kandidet jong ka ha  baroh 29 tylli ki Constituency, katba ka UDP ka don 26ngut, ka NPP 18ngut bad ka PDF 15 bad ka HSPDP 13ngut. Ki kyrtong shimet ki don 18ngut baroh.

Ki kandidet kynthei ki long ka kong Rona Khymdeit, ka kong Amanda Anette Pakyntein, ka Rebecca Kharmujai, ka kong Grace Mary Kharpuri, Teilina Thangkhiew, Saralinda Kharlukhi, bad ka kong Badariti Lyngdoh Nonglait.

Ha Jaintia District Council, dei tang ka  kong Violet Lyngdoh, ka kynthei  kaba iakhun elekshon ha kane ka kynti. Ka Congress, ka don 17ngut ki kandidet ha Jaintia District Council, ka NPP 27 bad ka UDP 26ngut. Ka PDF, ka don 9ngut ki kandidet, ka HSPDP, ka don uwei u kandidet  bad ki dkhot shimet ki don 19 ngut. La iathuh ba ka jingjied ia ki shap jong ki kandidet shimet, kan long ha ka 11tarik Rymphang 2019.