|
Ka Tamasa san snem ka dei ka Tamasa ba shongshit tam na baroh ki kynja Tamasa. Haduh ba ka pynduh thiah duh dem ia ki paid Nongkyrshan kiba iaid sharum shaneng ban khring paid sha u kyrtong uba ki iashah. Ymtangba ka ktik ia ki jingmut jingpyrkhat kiba la san hynrei ka ktik ruh wat ia ka jingmut jong ki khunlung khynnah. Shaneng sharum phin ioh sngew ia ki khunlung khynnah ba ki ia kynud ia phawer ia ki sur ba sngewtynnad jong ki kyrtong bapher bapher. Kane ka Tamasa shisien san snem kam dei shuh kaba dang thymmai kumta khlem pep ki paidbah kim dei ban klet ba kumno u nongmihkhmat jongki u trei ha ka por ba ailad ia une ia ka ban mih khmat na ka bynta ka thain jong ki. Kum ki paid nongjied ngi dei ban kyrtiang dien ia ki san snem ban thew ban woh ia ka rukom trei kam jong ki nongmihkhmat jongngi kiba ngi pynkup bor ban peit ha ka khia ka shon jong ka imlang sah lang jongngi. Ki mat ba katto katne kiba ngi dei ban thew ban woh ia ki rukom treikam jong ki nongmih khmat ka long kumne harum: 1. Hato ki surok shnong bad ki surok bah kiba pynpoi iew ia ki mar rep jongngi ki bha ne em? Lada don ki shnong ki bympat don surok hato u nongmihkhmat u la iarap pynioh surok ne em? Lada don ki shnong ba lah don surok hato ha ki por lyuir ki kali ba kit ia ki mar jongngi ki dang sah kut ne em ha ka ktieh?
2. Ka umbam umdih ka dei kawei na ki thied snam jong ki jingthaw ba im baroh kynthup iangi ki briew. Ngi dei ban peit bad bishar bha hato u nongmihkhmat jongngi uba ngi phah ban mih khmat ia ka thain jongngi u iarap ne em ban pynpoi umbam umdih lyngba ki kor um sha ki shnong ki thaw jongngi? Ne ngi dang leit tong um sha ki wahrit ne wahduid ne sha ki pung kiba ngi tih hi ha ki jaka ba don um? Hato ngi hap ban kit ia ki jain ki nep sha ki lum ki wah ban wad jaka ban sait ia ki jain ba ngi pyndonkam man ka sngi?
3. Ka jingkoit jingkhiah dei ka spah bah. Hato ngi la ju pynshong nongrim ba ngi donkam ia ki dispensary bad ki PHC ha ki nongkyndong kiba treikam ym kiba sah iingjah. Ki jaka sumar kiba don ki dawai ba don doktor bad ki nurse ban iarap iangi ha ka pang ka shitom. Ngim dei ban kmen ba u nongmihkhmat jongngi u siew bai dawai haba ngi leit wad dawai sha sor hynrei ngi dei ban pyrkhat bha ia ka bha ka miat jong ka thain hi baroh kawei ban peit bad jied ia u nong mihkhmat uba pynbiang ia ki jaka sumar ha ki thain ba ngi sah.
4. Hato u nongmihkhmat jongngi u iarap tang ia ki briew kiba jied ia u? Lada ngi kiba jied ia u nongmih khmat uba iarap tang iangi kiba jied ia u ne ia ka ngi dei ban pyrkhat thymmai ban jied da u briew u ban peit solansar ia ka khia ka shon jong ki paidbah. Namar dei tang u bympeit khmat shiliang u ne ka dei shisha kita ki nongmih khmat paidbah.
5. Ka jingshai (Electricity) ka dei kaba kongsan bha khamtam ha ki juk mynta ba ngi pyndonkam da ki rice cooker ban shet ja. Ngi dei ban peit hato u nongmihkhmat jongngi u ju peit ne em ia ki jinglip light ba khah khah ha ki shnong kiba ngi don? Ka jinglip light ba khah khah teng teng lah long myllen haduh ba ngim niew shuh ba ka dei kawei ka jingeh ba kongsan tam. Ka jingduh light khahkhah ka ktah ia ka pule puthi jong ki khynnah, ka ktah ia ka kam ka kam jong ki nongrep kiba hap ban niew ban kynshew ia ki mar ba ki wanrah na lum ne na bri ban pynpoi iew ha ki por mynstep. Kumta ngi dei ban bishar bha ia ka rukom lip light jongngi hato u nongmihkhmat jongngi u shim khia ne em ban pynkren ia kiba pynbiang light ban peit ia ki jingeh jongngi.
Ki don shibun ki jingeh kiba ngi donkam hynrei kine ki dei kiba kongsan bha bad kiba suk iangi ki nongthep vote ban leh ia ki homework jongngi khnang ba ngin sngewthuh ia ka jingtrei jong u nongmihkhmat jongngi. Lada don ki nongmih khmat kiba ymlah satia ban iarap ia kine ki jingdonkam ba kongsan jongngi ki nongkyndong, ka por ka la biang eh ba ngi dei ban bujli nongmihkhmat. Kynmaw ia kane kawei ba ngim dei ban ngop ha ki bai mitmit kiba tang shi miet lah poi sha liew painkhana hynrei ngi dei ban pyrkhat ia ki jingmyntoi kiba lah ban ioh lyngba ka roi ka par lyngba ki surok kiba lah ban pynkiew ia ka rep ka riang ka khaii ka pateng bad ruh ki ban ai kam ai jam khamtam ka juk mynta kaba ki kam Tourism ki kiew bha sha ki thain nongkyndong. Lada ki surok ki bha kin bun ki nongwan jngoh kai ki ban wan shang pyngngad bad kane ka pyniohkam iohjam ia ki briew ka thain hi baroh kawei.
1, Na ka bynta ki kyrtong pat ka jingai jingmut ka long ba lada phi ai kano kano ka jingkular ia u paid nongthep vote ba phin leh eiei ban kyntiew ia ka thain ba phi dei peit, phi dei ban bat la ka kular bad pyndep kat kum ka kular ka jutang kaba phi ai sha u paidbah. Lada maphi ki nongmih khmat phi lehbha bad wanrah ia ka roi ka par sha ka thain kaba phi dei peit nga tip skhem phin ym da donkam ban leit canvas ban khroh vote sharum shaneng namar lada phi leh bha phin ialap election na jingthiah ruh phin jop beit.
2. Sngewbha wat shaniah than tang ha ki jingai jingmut jong ki party leader jongphi hynrei peit bha bad pynshong nongrim ia ki jingdawa jong ka kam. Namar nga la iohi bun napdeng ki nongmihkhmat ki liem noh dei namar ka jingshaniah ha ki leader haduh ba kim sngap ia ka sur u paidbah.
3. Pyndonkam da ki social media khnang ba phin lah ban ia connect bad u paidbah. Ka social media ka dei ka platform kaba phi lah ban iathuh bad pyni paidbah ia ki kam kiba phi trei. Hynrei kam dei pat ka social media kaba phi shu ai jingtip ia kaei kaba phi trei hynrei ruh ka long kaba donkam ba phin da interact ruh bad ki paidbah tengteng lyngba ki social media kum ki facebook, Twitter bad whatsapp. Kum ki nongmihkhmat mynta phim da donkam eh ban khroh ia ki media ban pynphriang ia ki jingtrei jongphi hynrei direct hi nalade phi ioh ban pynmih kat kum ka kam bad ka jingkwah jongphi. Lada phi long active ha ki social media khlempep phin nang iai kiew ha ki
4. Wat klet ia ki paidbah bad wat niewbein ia kiba pynkup bor iaphi ban long ki nongmih khmat. Sngewbha kynmaw lem ia ki ymtang ha shwa ka election hynrei kynmaw ia ki baroh san snem. Treihok la ka kam pynroi ha ki thain ba phi dei peit. Wat ai bai mitmit mo namar tang shu ai bai mitmit kin sa don pat ki por ban mih ki nongtyrwa bai cake ba kham heh dor ban ia i mitmit sha ki paidbah nongjied nongmih khmat.
Kyntang ia wai nga ai khublei kitbok kitrwiang iaphi baroh ki ban iakhun MDC baroh bad iangi ki paid nongjied ruh ngin pyrkhat sani bha ban jied da u briew u ba kynsai tam ban ia kit ia tynrong lem ia ka ri bad ka jaidbynriew jongngi. Ngin kiar na ka ia bein ia khoh ia sin ia rngop para briew la ka dei ia ki kyrtong ne ia ki nongkyrshan jongngi. Ai ba ka tip briew tip blei kan ioh jaka ha ngi iwei pa iwei ba kan im bad roi ka jaidbynriew baieit eh jongngi.
|
Phi don ban ong eiei?