Suba u bah Pynshngain, ba dei u CEM ba kynthoh bamsap Monolith

Shillong,24 Lber:
U CEM barim ka KHADC u bah Pyn shngain N Syiem haba ia kynduh bad ki nongthoh khubor mynta ka sngi, u la pynpaw ka jingsngew bitar halor ka jingkynnoh bamsap na ka Tamasa Monolith kumba la mih ha ka kot khubor ( ym ha u Rupang). U la kynnoh ruh ba kitei ki jingkynnoh ki dei kiba la mih na u CEM ba thymmai ka KHADC u bah Ardent Basaiawmoit.
Haba pynshai ba kitei ki jingkynnoh ki dei tang ki jingpyrshang ban pynsngewthuh bakla, u bah Pynshngain N Syiem u la byrngem ruh ba un wanrah da ka jingiatai Zero Hour lashai ha Ing Dorbar ka KHADC. “Nga sngewthuh ba kitei ki jingkynthoh ki wan na u CEM ka KHADC, u la dei ban lum shuwa ia ki jingshisha kiba thikna ban lap ia ki jingshisha” ong u bah P.N Syiem.
U bah Syiem u la ong ruh ba kiba kum kitei ki jingkynnoh ki ktah ia ka burom ka ijot ka KHUDA, wat la ki don ki dkhot ka KHUDA kiba la kylla ARPA noh mynta. “U CEM u la dei ban wad shuwa ia ki jingshisha ryngkat ka jingiatreilang bad ki ophisar ka KHADC” bynrap biang u bah Syiem bad u la ong ruh ba ka KHADC ka don ia ka Engineering Wing bad u Project Engineer ban peit ia ka Project bad kumno ban pyllait ia ka bill katkum ka Project ne katkum ka jingpaw ka kam.
Haba pynshai halor ki jingkynnoh ba tang na ka bynta ka surok la pynlut 1.24 klur tyngka u bah Pynshngain, u la ong ba ha kaba ia dei bad ka surok, ym pat don jingsiew eiei lait noh tang ha ka khongdong bad khyndiat i bynta ban pynpoi sha ka Madan shad kaba la siew tang T.18 lak tyngka. Ha kaba ia dei bad ka Museum u la ong ba la shu wai ia ki tiar ki tar tynrai tang T.1 lak tyngka na u bah War.U la ong ba ka na ka T.5.97 klur tyngka kaba la mang ban pynlut haduh mynta dang pynlut tang T.2.80 klur tyngka. U la ong ruh ba ka kam ka dang iaid shakhmat, bad ia ka bill ruh ym pat siew lut. Ha kaba ia dei bad ka DPR , u CEM barim u la kyntait ha kaba u la ong ba ym shym pdiang ia ka DPR kaba ka kompeni kaba pyntrei kan oh dor katba mon, hynrei ki pyllait ia ka bill , katkum ka kam

kaba paw hadien ba la leit ban jurip ha katei hi ka jaka. U bah Pynshngain u la pynkynmaw ruh ba ia katei ka kam ban pyndep ia ka Khasi Heritage Village la aiti ha ka Anderson Structural Consultant.
Halor katei ka juh ka phang , ki nongthoh khubor ki la ioh ruh ban ia kren bad u CEM ka KHADC u bah Ardent Miller Basaiawmoit ha kaba u la pynpaw ia ka jingsngew lyngngoh ban iohi ia katei ka kam ha ki kotkhubor. U bah Ardent u la kyntait kumba la kynnoh da u CEM barim ba kitei ki jingkynthoh ki mih na u.
U la ong ba ka EC kam pat ia kren eiei halor katei ka phang , bad lada jia ba ka khubor ka lait na ki ophisar kiba long lehse ki tyllong khubor jong ki nongthohkhubor ki la dei ban pynthikna shuwa lyngba ki jingwad jingtip kiba bniah.
Ha ka ju katei ka bynta kynnoh bamsap na ka Tamasa Monolith u bah Ardent u la kam ba katkum ka jingiohi ha ki kot khubor ka don ka jingartatien, “ka don ka jingartatien, haba peit ka pisa ka la heh , ngim lah ban rai kyrkieh, ngi hap ban da pynshong nongrim bha da kaba ngi lah ruh ban thung da ka kynhun tohkit” ong u bah Ardent bad u la pynpaw ruh ba u don ka jingthmu ba lada phah tohkit kan bha da ka kynhun tohkit kaba laitluid ne independent inquiry. Kum u CEM ba dang shu shimti dang hapoh shibnai eiei u bah Ardent u la bynrap biang”‘Ngi wan hangne ban pynkhuid, lada ki don ki jakhlia ngin pynkhuid”.