Halor ka bhah thungkam thungjam ia ki samla Khasi ha NEPA, iakynduh Director ka KSU

Nongpoh: Ki nongialam ka KSU, hapoh ka jingialam u Samla Stevenson Kharkrang, President Umiam Circle, ha ryngkat ka jingdonlang u Samla August, u Samla Banjop Maring, u Samla Lester Nongbet, kiba dei ki nongialam ka KSU, North Khasi Hills, hynnin ka sngi ki la leit ban iakynduh ia ka Director jong ka North East Police Academy (NEPA) ka Kala Ramachandran IPS, ban iakren halor ka rukom thep kam thep jam ha NEPA, kaba don ha Umsawkhwan Ri Bhoi District.
Ka nongrim hi kaba la pynlong ia kitei ki nongialam ka KSU ban leit kynduh ia katei ka Director, ka dei katkum ka Notification kaba la pynmih ha ka 20/11/2018 bad kaba la pynpaw ba ki don ki kam bapher bapher kiba lait ha NEPA, kata kaba kynthup shna Light, kam Mistri lem bad kiwei kiwei ki jait kam, kaba la lah ban trei da ki samla Khasi,
Ha ka jingiakren bad katei ka Director, na ka liang ka KSU ka la kyntu ia ka Director ba ka dei ban pyrkhat lem ha ka rukom thungkam thungjam ha katei ka jaka aijinghikai ia ki Pulit.
U Samla Steven Kharkrang, u la iathuh ba katkum ka jingong da katei ka Director, ba ki samla kiba lah ban aplai ia kitei ki kam kiba lait ha NEPA, ki dei ban long kiba la pyndep ia ka Diploma.
Haba iadei bad katei kaba la pynpaw da katei ka Director, ka seng ka la pynsngew sha katei ka Director bad ai jingmut ruh ia ki bor bahalor, ba ki dei ban pynjynsur ha ka rukom thep kam ia ki khynnah Khasi, namar ha Meghalaya ym don Diploma, hynrei ba kin pdiang ia kiba dep na ka ITI na ki District ha ka jylla, ong u Samla S. Kharkrang.
Ha kane ka jingleit kynduh, ka seng ka la kyntu ruh ia ka ophis ba ka dei ban pyntip paidbah haba don kum kitei ki kam kiba lait bad kata ka long da kaba phah sha baroh ki kot khubor jong ka Jylla, khnang ba ki paidbah ki tip bad khamtam eh na ka bynta jong kito ki samla wad kam wad jam.
Ka seng ka kyntu ruh ia ki Nongmihkhmat, ba ki dei ban tuklar lem haba iadei bad ka rukom thungkam thungjam ha ki ophis treikam ka sorkar pdeng khnang, khnang ba ka long ka jingmyntoi ia ki paidbah ha ka jylla hi baroh kawei. Kumta haba iadei bad katei ka rukom thungkam ha NEPA, ka seng shen kan sa leit ban kynduh ia u Myntri Kam Pohing.