“Ngam ka liengsuin ha Indian Ocean, iap baroh 239ngut”

Kuala Lumpur,24 Lber:
La kumba ar taiew la wad ha kylleng ki jaka ia ka liengsuin ka Malaysia ka MH370 kaba la jah rngai naduh ka 8 tarik mynta u bnai, ryngkat ki 239 ngut ki briew kiba don hapoh jong ka, katei ka liengsuin ka la shu jah rngai tang marsien mih na Kuala Lumpur ban leit sha Beijing. Hadien ka jingwad kaba khlem shongthait, la iathuh ba mynta la lap ksai ba katei ka liengsuin ka la ngam, ha ka duriaw bah ka Indian Oceon bad ha kaba baroh 239ngut ki briew, kiba don ha katei ka liengsuin, ki la iap lut, ong u Myntri Rangbah Duh ka Malaysia u Najib Razak. U la iathuh ba katkum ki jingkdew jong ki bor satellite ba la pyndonkam ban wad ia katei ka liengsuin ka pyni ba ka don ha Southern Indian Oceon. U Myntri Rangbah Duh katei ka Ri u la ong ba haduh mynta ym pat lah ban ai ka khubor kaba thikna hynrei lashai ka sngi kin pynthikna noh sha ki bahaing ha sem jong baroh ki briew kiba don hapoh katei ka liengsuin.
”Nga sngewsih kthang ban pyntip sha phi ba katkum ka jingkdew jong ki bor satellite ka MH370 ka don sha ki bynta ba kut ka southern Indian Ocean” ong u Razak, uba la iathuh ruh ba na ka liang ka Malaysian Airline ka la pyntip ia kane ka khubor sha ki bahaing ha sem jong ki lanot. U Selamat Omar, u kpa jong uwei u Enjiniar uba dang 29 snem karta uba don hapoh katei ka liengsuin u la ong ba kane ka khubor ka la pynpait dohnud ia ki ba haing hasem, “Ngi pdiang ia katei ka khubor ba sngewsih , ka dei ka nusib” ong u Selamat haba kren sha ki nongthohkhubor ha Kuala Lumpur.