Shillong: U MLA barim ka UDP na Shillong West u bah Paul Lyngdoh, u la ong ba ka jingmih jong u ban ia khun mynta ia ka elekshon MDC ka dei na ka daw ka jingduna palat ki nongialam hapoh District Council. “Ka don ka jingthylli kaba shyrkhei ha ka jingdon ki nongialam, nga dei ban mih shakhmat ban pynshlur nalade ban pyni ia ka jingdon ki nongialam kiba biang” ong u bah Paul Lyngdoh haba ia kren bad ki nongthohkhubor hadien ba u la dep thep kyrteng myn hynnin ka sngi.
U bah Paul u la ong ba ha ki snem kiba la leit noh ki MDC kim shym la lah satia ban trei katkum ki kam kiba u paidbah u la pynkit ha ki bad kane ka la pynshong kynrong ia ka jingskhem ki trai ri ruh, “Nga kwah ban ioh ia ka EC kaba thymmai ka ban ia trei ryngkat bad ka sorkar jylla namarba baroh shi katta la shu ia tyngkhuh hapdeng ka District Council bad ka sorkar, ka jylla bad ka District Council ki don la ka jong ka bor” ong u bah Paul.
Haba kylli kumno u sngew ba mynta ka kynti un hap ban ia khun pyrshah ia u General Secretary barim ka KSU u bah Auguster Jyrwa, u bah Paul uba dei ruh u President barim ka KSU u la ong “Lada kheiñ ha ka KSU u Auguster u dang dei tang u khun ksiew jong nga, nga la long ar pateng shuwa jong u, ka Jaiaw ka donkam ia ki briew kiba la ih kiba shemphang bad ka donkam ruh ia ki briew kiba la dep Test ka la dep tynjuh, nga ialade hapoh KSU nga don 10 snem, ha Ing Dorbar Thaw-aiñ nga don 15 snem, u blei u la ai ha nga ia ka sap kum u nongialam” u la ong.
Shuh shuh u bah Paul u la ong ba ka jingshah rem jong u ha ka elekshon kaba la dep ka dei namar ba ka trei ka Vote Bank Politik na kiwei pat ki jaitbynriew, “Ki bar jylla hangne ki vote ia ki Party heh (National Party) ki briew jong ngi pat ha Mawlai ki vote ia ka Congress, ha Pynursla ki vote ki Vote ia ka NPP, kiwei ki jaitbynriew ki kham shemphang ban ia ngi, ha kaba kut kiwei pat ki jaitbynriew ki dei ki nongrai ia ka jop ka rem jong ki kyrtong hangne ha sor” ong u bah Paul.
Ha kaba ia dei pat bad ka ILP, u la ong ba ha u 2013 ma u bad ki paralok MLA jong u ki la kyrshan radbah ia ka jingdawa ILP bad ha katei ka por ka dei ruh ka sien kaba nyngkong ban pynthud ia ka Ing Dorbar Thaw-aiñ ha kaba ki MLA ki la tur sha ka miej jong u Lamphang, ka dei ka aiñ kaba don bniat, u la ong.
U bah Paul u la ong ruh ba lada un wan ha ka bor hapoh District Council ki don shibun ki thong kiba un trei bad kawei na kita ka long kum ka jingpyrkhing ia ka laisen khaii, ka laisen bylla, ka jingpynkhlaiñ ia ki bor ka District Council, “Phi iohi hi haba leit khynra laisen shah shoh kylla ki Enforcement (pulit KHADC), phin sa iohi kaei ka ban jia” ong u bah Paul Lyngdoh u kyrtong ka UDP na Jaiaw.
Phi don ban ong eiei?