Shillong: Ka kynhun ki sengbhalang hapoh ka lama ka Confederation of Hynniewtrep Social Organisation (CoHSO) ka la ioh ia ka jingkular na u Symbud Myntri Rangbah u bah Prestone Tynsong ban pynkhlain ia ka Meghalaya Resident Safety and Security Act (MRSSA) 2016 ka ban long kum ka Inner Line Permit (ILP) khnang ban pyrkhing ka jingrung jingmih ki briew nabar.
Haba kren sha ki lad pathai khubor mynta ka sngi, u chairman ka CoHSO u bah Robertjune Kharjahrin u la ong,” U Symbud Myntri Rangbah u la kular ban wanrah ia ka jingpynkylla ia ka Meghalaya Resident Safety and Security Act (MRSSA) 2016 hashwa ban wan ka sorkar mang tyngka ha u bnai Lber bad u la iathuh ba ka tnad Political bad ka kam ain ka la bunkam ban trei borbah ia kane ban wanrah noh ha ka ing dorbar thawain”.
U bah Robertjune u la ong ba la khmih lynti ba kane ka jingkular jong ka sorkar kan nym long kamkai.
“Ngi khmih lynti ba ka sorkar kan bat ia ki kyntien kumba u symbud myntri rangbah u la kular hakhmat jong ngi”, la ong u bah Robertjune.
U la ong ba na ka liang ka seng ka la dep ban ai jingmut sha ka sorkar halor kumno ban pynkhlain ia ka MRSSA da kaba bsuh da ki kyndon ka ILP.
“Ngi la dep ai ka jingai jingmut ban pynkhlain ia kane ka ain ba kan dei kaba kum ka ILP. Lada don ka jingpynkylla ia ka MRSSA, ka dei beit ki kyndon ka ILP hynrei kam don jingmut kata ka jingpynkylla”, u la ong.
U la ong ba ka CoHSO ka la iaid dawa ba ka sorkar ka dei ban pyntreikam da ka ILP ha baroh kawei ka jylla ym tang ha ki katto katne ki jaka.
“Ngi donkam ban khang lad ruh ia ka jingioh thied jaka ki briew nabar, kynthup ki riewlum na kane ka dong mihngi ka India, namar ba ka ILP ka dei tang kawei ka bynta”, u la ong.
Phi don ban ong eiei?