Shillong: Ka kong Amanda Pakyntein ka la thep kyrteng ialade mynta ka sngi na ka PDF na Mawkynrew sha ka elekshon sha KHADC ka ban long ha ka 27 tarik Rymphang.
Haba kren mynta ka sngi sha ki lad pathai khubor, ka Kong Amanda ka la ong ba ka jingiakhun jongka ia kane ka elekshon MDC kam dei ba phah I lok hynrei dei namar ba ki paidbah ki la jied ia ka ban mih madan.
Ka Kong Amanda ka dei ka lok jong u MLA uba long ruh u myntri sorkar jylla u bah Banteidor Lyngdoh, uba jop ia ka MLA bad u MDC mynshuwa. “Ka jingiakhun ia ka elekshon kam dei ba pynbor I lok, ka dei ka jingpynbor bad ka jingjied jong ki paidbah”, la ong ka kong Amanda.
“Ka dei ka jingmon jong ki paidbah, kam dei ka jingpynbor na iing na sem”, ka la ong bad bynrap ba, “ngin kmen ba ki kmie ki kpa ki shait nang ban ri ia ki khun ki kti bad shathie ruh sha konstitwensi Mawkynrew ngin shakri ia ki kum ki khun ki kti”,.
Ka la ong ba ka jingangnud jongka ban mih madan ka long ban iada ia ka khyndew ka shyiap bad ka jingma na kiwei namar ba ka dei ka jaitbynriew kaba rit.
“Ka jaitbynriew jong ngi ka long tang shi shamoit hakhmat ka India bad ka jingdon ka 6th scheduled kan iada ia ngi ki rit paid, ia khyndew ka shyiap, ka kolshor, nga kwah ban pynkhlaiñ ia kita”, ka la ong.
Ka la ong ruh ba kum ka longkmie kaba peit bad ioh bynta bha, ka don ka bynta kaba khraw ha district council ban saiñ kham bha ia kane.
Ka la pynpaw ia ka jingkyrmen ba kan poi sha ka thong ha kane ka kynti namar ba ka sawa bha ka lyer jong ki paidbah.
“Nga kyrmen ba ngan jop namar ba ngi la iaid shakhmat bad kam don kano kaba beh shadien”, ka la ong.
Na Mawkynrew ka jingiakhun kan long hapdeng u MLA bad MDC barim u bah Martle N Mukhim na ka HSPDP, u bah Olet Kharsahnoh na ka Congress nalor kiwei.
Phi don ban ong eiei?