Bym poi tulop, pynpait u shipai ia ka ATM

Shillong, 23 Lber:
U shipai (Havildar) ka tnad Assam Regiment Centre (ARC) u la shah ha ka sngi thohdieng jong ka taiew namarba ba u la pynpait ia ka ATM kaba don hajan ka Military Hospital, Shillong. U tei u shipai u dei uba la tip kyrteng kum u Pranab Kumar Ray (38) u dei uba trei ha ka tnad Assam Regiment Glacier Unit, la sdang ban tohkit ia u naduh ka sngi saitjian, la hukum ba un don hapoh ka judicial custody. Ki pulit ki la kem ia utei u shipai hadien ba ki la ioh jingujor na u D. Guru Raja Rao, Assistant general manager SBI ba ha ka 26 tarik mynta u bnai ba la lah ki runar ki la pynpait ia katei ka ATM kaba don ha katei ka jaka.
Hadien ba la ioh katei ka jingujor ki pulit ki la leit ban wad jingtip na ka SBI administrative branch, kaba don ha Bawri Mansion bad hadien ba la peit lyngba ka CCTV la lap ba uba la donkti ban pynpait ia katei ka ATM dei pynban u shipai ka ka ARC.
Kham hadien u heh shipai jong katei ka tnad u la lah ban ithuh ba utei uba donkti ha katei ka kam dei u Pranab bad la phah ia u sha u Commanding Officer 101 area bad la kem noh ia u na Madanrting. Katkum ka tyllong khubor ba la ioh lum na ki heh katei ka tnad shipai ki la iathuh ba utei u shipai u dei uba don jingduna ha ka bor pyrkhat. La iathuh ruh ba utei u shipai u khlem ioh tulop la katto katne bnai bad haba u la leit ban peit ia ka pisa jong u lyngba katei ka ATM u la khie bitar bad pynpait ia ka ATM.