Shah kem ar ngut na Wahkhen

Shillong, 23 Lber:
Ar ngut ki briew ki la shah kem ha shnong Wahkhen kaba hap ha Pynursla Police Station halor ka jingkynnoh ba ki donkti ban shoh ia uwei u rangbah ba la 60 snem ha ka 21 tarik Lber.
Katkum ka khubor ba la ioh lum na katei ka shnong, la iathuh ba ha katei ka sngi, uwei rang bah ba la tip kum u Bah Hum Khongsit u la shah shoh ha ki katno katne ki briew ha katei ka shnong katba u dang iaid lynti ban leit sha iing ha ka por janmiet. Halor kane ka jingjia, kiba haiing utei u rangbah ba shah shoh, ki la ai jingujor ha ki pulit ka Pynursla halor kane ka jingjia.
Ki pulit ka Pynursla ki la hiar sha katei ka shnong bad ki la kem ia ar ngut ba la tip kyrteng kum u Pynngeit Tynsong bad u Salam Khongsni bad kiwei pat kiba la suba ba donkti lang ban shoh ia utei u rangbah, ki dang shah thwet ha ki pult ban kem. Utei uba shah shoh bad kiba shah kem ki dei na shnong Wahkhen.
Hynrei haba iakren bad ki pulit ka Pynursla, ki kyntait ban ong ei ei halor kane ka jingjia.
Une u rangbah u dang shah sumar ha Civil hospital Shillong namar ka jingshitom jur na ka bynta ka khlieh, shadem bad ki kti.