Nongstoiñ: Ka kynhun ialehkai jong ka Iawphniaw FC kala lah ban jam sa sha ka Quarter Final jong ka lympung 2nd Invitation Knock out Football Tournamement bala pyniaid da ka New Nongstoiñ Sport Social & Cultural Club, hadien ba kala ioh ban khur ia ka jingjop ha ka jingiakhun ia ka pre quarter final.
U Rison Malngiang jong ka Iawphniaw FC u bala ioh ban khur ia ka nam Man of the Match.
Ka jingjop jong ka Iawphniaw FC kala wan hadien ba kala lah ban pynliem noh ia ka kynhun ialehkai jong ka Khiemusniang FC da 2 kol la 1 kol ha ka jingiakhun pre quarter kaba la long hynnin ka sngi ha ka madan ialehkai jong ka shnong New Nongstoiñ.
Ka jingiakhun pre quarter kaba la long hapdeng kitei ki ar tylli ki kynhun kala long shisha ka jingialehkai kaba itynnad bha bad ha kaba sdang jong ka kylla step na ka liang jong ka Iawphniaw FC kala ioh ban lam khmat da 1 ia kaba la ioh ban thep da u Rison Malngiang minit 24.
Hadien katei ka jingshah thep kol na ka liang jong ka Khiemusniang ruh kala iakhun tyngeh ban ioh pynphai noh ia katei ka 1 kol bad katei kala wan ban ur long ha ka minit kaba 36 bad ia katei ka kol la ioh ban pyniakhaid da u Arwin Dkhar ha ka minit kaba 36 jong ka kylla step.
Shuh shuh ha shwa ba ka jingiakhun jong ka kylla step kan kut noh na ka liang jong ka Iawphniaw FC kala ioh ban khyrwit sa ia ka kol kaba ar bad ia katei ka kol la ioh ban thep biang da u Rison Malngiang ha ka minit kaba 42 bad hadien katei ka jingshah thep kol na ka liang jong ka Khiemusniang kam lah shuh ban pynphai bad hap ban mad syndon ia ka nam rem.
Ha katei ka sngi ia ka nam man of the match la ioh ban khur da u Rison Malngiang jong ka Iawphniaw FC u bala la ioh ban thep ia kitei ki ar tylli ki kol kiba kynsai iala ka jong ka kynhun, bad na ka liang jong ka NNSSCC kala pyntip ba ka jingialehkai ka ban bud kan long biang sa ha ka 4 tarik mynta u bnai ha kaba ka Mawlai Mawtawar SC vs 7Wasa.