|
Khana babteng
Hadien shi taiew ba la iakynduh bad u Bah Malki . Ka Daplin ka la iathuh khana ha ka Lanosha ba u Bah Malki un sa wan kai ha iing jong ka.
“Lano Ito I Bah in sa wan kai shane…” La iathuh ka Daplin katba dang iashong kai ha iing jong ka
“Lano in wan…? ” La kylli pat sa ka Lanosha
“Im pat buh sngi hynrei I ong in sa pyntip hi…” La batai ka Daplin
“Kata te imat I la mon iapha… Kongthei..” la biria ka Lanosha bad rkhie de
“Tip shuh…” La jubab Ka Daplin
“Tangba uba pli phi pat ba la don ba buk lypa te mo… Phim lait post shuh..” la bynrap ktien ka Lanosha
“Shuh pha mano ba la buk kum nga …. La da u mon te ngan kdup ei..” La phai ktien ka Daplin
Ka Lanosha ka la mutdur ha lade sa kumno pat kan ong namar da la ki jong ki shkor ka ioh sngew ba mynshuwa ka Kongthei ka la ong teng ba ym slem shuh kan kiew kyrdan noh. Hangta ka sdang ban pynkynmaw
“Phi ong pat ianga myn shem snem ba phin sa kiew kyrdan noh ym slem shuh…!” Ka peit sha ka Daplin
“Ia kaba shu ong te pha… Nga mut kein tangba ym pat iakynduh pat bad u briew ba ia biang…” La phai ktien pat ka Daplin
“O ka mut lada wan I Bah Malki phan treh ia I….” La buh jingkylli ka Lano
“Ngan da peit ngam pat nang ong ia kata namar im pat ju wan te mo ha iing… Shu iakynduh kumto ha lynti tip uba long kumno u briew..” la phai ktien biang ka Daplin
Katba dang ia shong kai hangta ka Lanosha ka kynmaw ia ka kyntien u Kpa jong ka ba u ong
“Uto u briew uba I biang bha..” Hangta ha la ka mynsiem ka la sngew sahnud ioh lehse ka Daplin ka la don eiei bad u.
Kumta haba la ioh jingtip kumta na ka Kongthei Daplin kaba la iathuh hi ia kita kiei kiei ka Lanosha ka la lum khui ha la dohnud bad ka la pyrkhat lypa ban sa phun noh ia u ynda la poi ha iing. Kumta hi kam pynjrong khana eiei shuh shaphang kata, hynrei ki kdat noh shawei bad hadien ba la dep dihsha sngi ha kane ka iing I Kongthei Daplin ka Lanosha ka leit phai noh sha la iing.
Marsien poi ha iing khop ka leit sha la kamra thiah bad ka dem ngun ha ka phun ban iathuh ha u Bah Malki shaphang kaei kaba ka la ioh sngew na ka Kongthei Daplin. Dei ha kane ruh ka jingiakren ba ka sa tip na u Bah Malki ba ka Kongthei Daplin ka wan wad hi ia u ha ophis bad ka tip ruh ia ka jing leit ai gift new year jong ka ia u.
“Pleng I wan wad hi mo iaphi… Ka jingiathuh pat sngew kumba ka shu iakynduh haei re haei. To to nga la sngewthuh…” La bynrap ktien ka Lanosha ha kata ka jingiakren bad u Bah Malki
“Tangba Lano phi wat iathuh eiei ha I ba ngi ia kren kumne … Hynrei kawei kaba nga don ban ong iaphi lada phi sngew sih ne sngewbha ruh ba ka mon jong nga ka dem ha phi…” La pynpaw u Bah Malki hangta
Marsien iohsngew ia kata ka ktien ka Lanosha ka shu sngap jar. Haduh ba u Bah Malki un kylli
“Lano balei pat phi shu sngap jar…?”. [yn dang bteng]
|