Shillong: Ka synjuk Kur Wahlang Pahsyntiew Phrakpoh jong ka Hima Jirang myn hynnin ka sngi ka la iakynduh ia u Executive Member ka Elaka ka KHADC ha kaba ka la ai dorkhas pyrshah u Syiem Hima Jirang u Paiem RH Wahlang halor ka jingleh donbor jong u bad ki Myntri kaba long pyrshah ia ka riti dustur.
Ki Nongialam kakur pahsyntiew, kiba dang ai dorkhas ia u Bah Latiplang.
Ha ka dorkhas ba la soi da u President Bah Gumbries Wahlang bad Secretary Bah S Wahlang, ki la dawa jur ba ka KHADC kan weng noh mardor ia u Syiem, namar ula khlem lah ban pynlong dorbar hima la san snem naduh 2013-18, nalor ki kam tih maw bad khyndew, ka jingpynlut ia ka pisa hima ba T.20 lak bad pynduh ia ka khlaw ha Rani Jirang khlem ka jingmynjur ka dorbar hima ka la pynlong ia ki khun ki hajar ban sah ha ka umdum.
Ki la pynpaw ba ka jingleh donbor u syiem ka la paw pyllein lyngba ki kot ki sla ba ki la ioh ba ula ai pata sha ki dkhar ban tih maw bad khyndew na ka Hima kaba long pyrshah ia ka riti synshar bad ula pynkhein ia ka Meghalaya Land Transfer Act 2010.
U la ai ruh wat ka No objection Certificate ia u bar jylla ba la ithuh kyrteng u Depok Buruah ba un ioh ban apply ia ka Deed Declaration ha ophis Deputy Commissioner, Nongpoh, Ri Bhoi District.
Ki la ong ba u Syiem ula phiah ar liang wak ia ka Kur Wahlang Pahsyntiew ba 10 kpoh hadpeng ki 2 kpoh Kuia bad Narlong bad khein nongwei ia ki 8 kpoh ha ka synshar khaddar kiba dei hok ban ioh mynta katkum ka riti ki dustur ba la buh ki longshwa mynshwa.
Kane ka kynhun ka la kynduh ruh ia u CEM KHADC, Bah HS Shylla bad la donlang u EM Bah Latiplang Kharkongor haba ki la pynpaw ia ka jingsngewkhia jur bad na liang jong ki la ong ba kin bishar bniah ia kane ka kam, namar ka dei ka kam iap kam im jong ka jaidbynriew bad ki kyrmen ba kin leh kham noh kloi katba lah.
Kum ban pynkynmaw ka kam Syiem Hima Jirang ka la sah teng la palat ar snem ha KHADC naduh ba bat u Bah Lamphrang Blah, MDCMawphlang kum u EM Elaka bad hadien la shimti noh da u Bah Latiplang Kharkongor kum u EM bad shah knieh noh ha u CEM barim ka KHADC, Bah PN Syiem bad ka iaid sha ki ar lai tyllli ki miej jong ki EM bad mynta ka la poi biang ha u Bah Latiplang Kharkongor.