Pynrem ka MPHRC ia ki pulit Assam

Shillong, 20 Lber:
Haba ther tyngeh ia ka jingshah pyndik bad shah thombor ki briew kiba sah ha ki thain ïakaja pud hapdeng ka Assam bad Meghalaya, ka daw bah daw san ba ki pulit jong ka Sorkar Assam ki ju nud ban thombor ïa ka hok Longbriew Manbriew ha kine ki thain ka dei tang namar ka jinglehsting palat jong ka Sorkar Meghalaya halor ka jingbym shimkhia ban pynbeit noh ïa u pud u sam mynta palat 42 snem, kynthoh jur u Bah Dino D.G. Dympep, Chair man ka Meghalaya Peoples Human Rights Council (MPHRC).
“Haba pynrem jur ïa ka jingshah bom bad pynmynsaw ki Pulit Assam ïa ki 3(lai) ngut ki samla na ka shnong Jata long, ka MPHRC ka dap da ka jingsngewkhia kaba khraw halor kane ka jingjia bad ka pynrem jur ïa ka ne ka jingleh riewkhlaw jong ki Pulit ka tnat Forest Assam khlem kano kano ka daw kaba biang.
Ka MPHRC ka dawa shisyndon ïa ka jingtohkit kaba kyrpang halor kane ka jingjia bad ka kyntu ïa ka Myntri ka tnat Pohïing ka Jylla I kong Roshan Warjri ba ka dei ban tuklar hi mar mar dalade ïa kane ka kam bad ha kajuh ka por ban wad ïa ki lad ki lynti ban pyntikna ba ki briew kiba sah ha kine ki thain ki dei ban ïoh ka jingiada kaba kyrpang na ki pulit ka jylla Meghalaya khnang ba kin ïoh ban shong suk shong sain khlem kano kano ka jingshah pynthut ha ki Pulit ka Sorkar Assam.
Kyntang ïawai ka MPHRC ka kwah ban ong “Lada ha ki snem kiba mynshwa da ki phew hajar ngut ki briew ki la kylla long ki nongphet wir ha ki Thain Sahsniang, lada ha u snem 2005 kumba shiphew tylli ki ïing ki la shah thang dusmon ha ka shnong Lum Dorbar bad dang ha kine ki khyndiat snem ki la don ki mynsiem briew kiba la duh noh lyngba u kuli ba nep ki pulit Assam ha Langpih, ka jingkylli kaba mih mynta ka long hato ka Sorkar Meghalaya ka hun mo ba kan shu long tang kum ka nongpeit kai ïa kine baroh”? pynkut ka kyrwoh na U bah Bah Dino D G. Dympep, Chairman, MPHRC.