Shah beh ki kali kit niut “leit theh ha phyllaw ka kong Ampareen” “Ka la jop ia ka Umsawli, ka la jop ia ka sia lieh, ngin ym ailad ha Mawlai”

Shillong,19 Lber:
Ka jingshah kynnoh ‘Slum’ ka shnong Mawlai ha ka kong Ampareen Lyngdoh ka la pyning bad pynbitar ia ki nong Maw lai, bad ka la poi shaduh u pud ba ki nong Mawlai kim shah shuh ia ki kali kit niut kiba kit ia ki jaboh jabain ka sor Shillong ban leit bret sha Marten; ka jaka theh jaboh kaba hap hapoh ka shnong Mawlai. Katei ka jingbym ailad ki nong Mawlai ia ki kali kit nuit ka la sdang naduh mynta ka step. Ki nong Mawlai ki la byrngem ba kin ym ailad theh jaboh bad bteng ia ka jingbat ia ki kali kat bym pat ioh ka jingpan map, na ka Myntri ka tnad Pynroi sor ka kong Ampareen Lyngdoh.
Mynta ka sngi naduh mynstep haduh ka por shiteng sngi ki la don haduh kumba 15 ne 16 tylli ki kali , kynthup ia ki kali heh bad kali rit kiba la shah beh tang mar ia poi ha Petrol Pump , Mawlai Nongkwar ha ki nong Mawlai kiba la ap ktem lypa ha katei ka jaka. Ki samla ka shnong Mawlai kiba la ap ha katei ka jaka ki kynthup ia ka KSU Mawlai Circle, ka FKJGP Mawlai Circle, ka Seng Samla Mawlai Pyllun, ka Seng Samla Mawlai Mawdatbaki, ka MPF, ka MPDF, ki longkmie bad ki riew rangbah ka shnong Mawlai.
Haba ia kren bad u President ka KSU u samla Donbok Kharlyngdoh, u la ong “Ngin ym shah ia ki kali kit jaboh ba kin leit theh niut ha Marten, kat bym pat ioh ka jingpan map na ka kong Ampareen Lyngdoh” ki la dawa ruh ba ka kong Ampareen ka dei ban pan map lyngba ki jingthoh sha ki nongialam ki sengbhalang kiba don ha ka jingiakhih bad lyngba ki kot khubor. U bah Lyngdoh u la ong biang “Ka kong Ampareen ka la jop ia ka Umsawli , ka la jop ruh ia ka Sia lieh, ka la pyrshang ban nion sa ia ki nong Mawlai, ngin ym ailad”.
U President ka FKJGP u samla Marbud Dkhar u la ong ba ka kong Ampareen Myntri ka tnad pynroi sor, ka kwah ban pynhap jubor ia ka Mawlai ha ka slum area, u la dawa ruh ba ka Myntri ka dei ban pynshai mynno la jurip ( survey) ban pynthikna ba ka Mawlai ka hap ha ka Slum ne kiei kita ki slum improvement work ba la leh ha Mawlai, u la kdew ruh ba ka Mawlai ka dei ka shnong kaba khuid namarba ka hap hapoh ki thain nongkyndong lait noh tang katto katne tylli ki dong ba hap hapoh ka Semi Urban. Kiwei pat ki riew rangbah ba la ia donlang ha Petrol Pump ban beh ia ki kali kit nuit ki kynthup ia u bah Morris Lyngdoh, bah Pyndap Saibon bad kiwei.
Kham ha shuwa ha ka por ba ka jingpynieng kali ka dang shongshit bha, kiba bun na ki nongniah kali theh nuit bad ki nongpyniaid ki la kyrpad ban shah mynta shisngi namarba ki la dep ban thep ia ki jaboh ha kali hynrei ki nong Mawlai kiba la ialang khrui kim shym la ailad bad ki la phah ia ki kali ban leit theh ha phyllaw ka kong Ampareen Lyngdoh ha Laitumkhrah.
Lah ban kdew ba ki kali kit nuit kiba la shah beh mynta ka sngi , kim dei tang ki jong ka Municipal hynrei ki kynthup ruh ia ki kali kit nuit ki Seng Samla , ki shnong bad ki dong bapher bapher na kylleng ka nongbah Shillong, la pyllait tang ia ki kali kit nuit na Mawlai ban iaid.