“Don ki CHC, PHC bym don dawai”

Shillong, 19 Lber:
U myntri ka koit ka khiah ka jylla u Bah AL Hek u la ong mynta ka sngi, hapoh iing dorbar ba ki Community Health Centres (CHCs) bad ki Primary Health Centres (PHCs) ha ka jylla kim don ki dawai ban ai sha ki paidbah.
“Ka long kaba shi sha ba ym don dawai ha ki CHCs bad ha ki PHCs ha ka jylla”, la ong u Bah Hek haba jubab ia ka jingkylli ba la wanrah da u MLA ka Nongthymmai u Bah Jemino Mawthoh uba kylli la ka sorkar ka tip ne em ba ym don dawai ha kine ki jaka sumar.
U Bah Hek ha kajuh ka por, u la ong ba ka tnad ka la pyrshang ban buh dawai ha kine ki jaka sumar khnang ban pynbiang ia ka jingdonkam jong ki nongpang ha CHCs bad PHCs.
Halor ka jingkylli jong u Bah Mawthoh la ka sorkar ka don ne em ka jingiateh bad ki kompeni ban pynbiang ia ki tiar ban tes ia ki jingpang namar ba bunsien la phah ban leit sha ki jaka sumar shabar,u Bah Hek u la ong ba “baroh kine ki jingdonkam la kynthup lang ha ka Meghalaya Health Insurance Scheme (MHIS)”.