Shah beh U CEM JHADC bad 14ngut ki MDC na ka jingialang U Rahul

Shillong, 18 Lber:
Na bynta ki 14ngut ki MDC, ba kynthup ia U Chief Executive Member ba dang thymmai jong ka Jaintia District Council, ka jingwan iakynduh ia U Rahul Gandhi, Vice President jong ka seng Congress(I), ka la kylla long pynban, ka jinglehrain bad ka jingjia kaba sniewbok shibun eh mynta ka janmiet.
“Ki pulit kiba pahara ia U Rahul lem bad ki nongpyniaid ki ong ym don jaka shuh” iathuh U Ma Thombor Shiwat, CEM JHADC, haba iakren bad U Rupang. “Phi phah wan naduh Jowai, kumta balei phi phah wan kai” iathuh U ma Thombor, ba u kylli ia kitei ki nongpyniaid, hynrei ka jubab, kaba u ioh, ka long “Ba la la khapngiah, don tang ki kynthei suda” ong biang U Ma Thombor, ba ki iathuh, kitei ki nong pahara ha ka jaka jingialang.
La iathuh biang U Ma Thombor, ba ki la poi shwa ha katei ka jaka jingialang, ha Convention Hall, kaba don hadien Pinewood Hotel, ha ka por 5baje janmiet, hynrei, la iathuh, ba la pynkynriah noh ia ka jingialang sha ka por 8baje janmiet, namar ba U Rahul um ioh hiar khyndew ha Umroi, namar ka jingthut ka mariang bad kumta, u hap ban hiar noh ha Guwahati bad wan da ka kali sha Shillong. “Ngi poi 7.30 janmiet, ki ong ym don jaka shuh ban shong shapoh” ong U Ma Shiwat. “Manga U President, Secretery District bad 14, 15ngut ki MDC, ngi ia leit phai noh” ong utei u nongialam ka Jaintia District Council.