Shillong: Ka Meghalaya Tourism Youth Development Society ryngkat ka jingiatreilang bad ka Galmanand Supermodel India na Mumbai kan pynlong ia ka lumpung iakhun Miss Meghalaya 2019, ha ka 16 tarik Rymphang 2019.
Ka jingpyrshang ne Audition ia ka Miss Meghalaya 2019 kan long ha ka 2 tarik Rymphang 2019 ha Youth Hostel, Shillong por 11 baje mynstep bad ki thei samla kiba jrong rynieng 5.3 phut ki lah ban wan iashim bynta.
Kane ka dei ka sien ba nyngkong ha Meghalaya ha kaba ki thei samla kin ioh ia kane ka lad.
Kane ka rynsan yn pynlong hadien ba bun ki snem ba la sangeh noh. Nalor ka jingitynnad ka jaka, ki lum ki wah, ka Miss Meghalaya kan ai lad ia ki samla ka Jylla ban pyni iaki sap ki phong ha kine ki kam jong ka Beauty Contest Contest, Modelling bad Personality Development.
Haba kren mynta ka sngi sha ki lad pathai khubor, u bah Daniel Khongsit u la ong ba ka jingiakhun lahduh kan long ha ka 16 tarik Rymphang ha madan phutbol Bakur ha kaba ka nam ba nyngkong kan long T. 1 lak, kaba wan baar T. 50 hajar, bad balai T. 30 hajar.
Kiba ioh rah ia ka nam lahduh kin mihkhmat sha ka Miss India Earth, Miss International bad ka Miss Teen India.
U bah Daniel u la ong ba ka jingpynlong ia kane sha Bakur, ka dei namar ba ka dei ka jaka jngohkai kaba la khring ia kiba bun ki nongwan kai bad wat naduh Bangladeh ki briew ki wan ban peit kai.