Ha kine ki sngi, ka la kiew bha ka jing isteri ia ka shadem jong ki thei samla bad katei ka long na ka bynta ba kin kham rit ki jymbuin jongki bad ba kan nym pyn thaba ia ki khmat jong ki samla shynrang, ong ka khubor kaba la pynmih ha ka The Guardian hynnin ka sngi. Katei ka jingleh, ka dei kaba la ju leh bha ha Africa, ha kaba la niad isteri da u maw uba khluit bad katei ka long ban kham pynduna ia ka jingpaw eh ka shadem ki thei samla.
U maw bad u dieng, uba la pyndonkam ban isteri ia ka shadem jong ki thei samla
Ki kmie ki kpa ki shim, ba katei ka dei ka rukom leh, kaba bha tam, ban khanglad ia ki samla shynrang ba kin thaba khmat ia ki khun kynthei jongki. Na ka liang jong ka United Nations, ka shim ba katei ka dei kawei na ka jingleh, kaba long beain bad ki doktor ruh ki shim ba katei kan ktah ia kitei ki briew, ba kin ioh kansar shadem, ba kin nym lah shuh ban ai buin khun hadien bad sa kiwei ki jingpang, kiba ki la ioh ban ioh kham hadien.
Ha ki nongbah jong ka United Kingdom, kum ka London, Yorkshire, Essex bad ka West Midlands, la iathuh ba ki don bun ki thei samla, kiba ha ki khad snem jongki, kiba na African, kiba isteri ia la ki shadem jongki. Ka Margaret Nyuydzewira, kaba peit ia kawei ka kynhun, kaba la tip kum ka Came Women and Girls Development Organisation, ka iathuh ba ki don shi hajar ngut ki kynthei, kiba don ha UK, kiba la pynmlien ialade ha katei ka jing isteri ia ki buin jongki. La iathuh ba katei ka rukom isteri, la lah shisien ha ka shi taiew bad don ba ki leh shisien ha ka ar taiew bad katei ka shong ha ka rukom sngew iahap jong kitei ki thei samla.