|
Khana babteng
Ynda la rung ha dukan sha ki ar ngut ki Thei Samla ki la shong mar pyrshah bad u Rang ha ka Ben ka ba la buh ban dihsha. Shlip ki khmat u Bah Malki ki la suh ban ianujor hapdeng kita ki Thei iwei ia iwei pat.
“Ka Lanosha ka kham lah hi ban ia ka Daplin…” La Khan u Bah Malki ha la dohnud.
Hadien ba la poi ka sha ba la pan, ki ia dih bad ka iathuh khana artat ia kane katai. Haba la dep ka Lanosha ka la ong
“Ei ia noh phi ngin ia mih noh…”
“Hooid kein, ia noh lah miet artat…. Nga lei sa ban leit shet leit tiew…” La ban ktien sa ka Daplin
Kumta ki ia mih noh nangta. Bran baroh lai ngut ki pynbeit la ki kjat thiaw sha ka surok ka ban leit sha ing sah jong ki. Kumjuh ruh u Bah Malki um phai shuh shawei ne sha ar hynrei beit beit u ruh u leit ryngkat bad ki ban leit beit noh sha la iing.
Mar sien lait ka khmat u Bah Malki ki ar ngut ki sdang ia thain nia shaphang kaei kaba ki la iaid lynti ha kata ka sngi.
“Nga hi te shisien peit, nga da itynnat palat ia uto u Bah…” La sawa na ka shyntur ka Daplin
“Wa Kongthei , kumno kumta phi ong…? Nga nang mut phi la don paralok lypa ba nga kynmaw phi iathuh ianga ba phin sa kiew kyrdan noh ha u snem ban wan ..” La ong pat ka Lanosha
“Shano pha … Ngam don tang ba nga te lada ioh jingtyrwa na u briew ba nga I shaniah nga kloi ban aiti noh ia lade..” La phai ktien ka Daplin.
Ka Lanosha ka la sngap jar shiphang kum ka ba pyrkhat sa kumno pat ban kren. Katba ka Daplin ka nang bteng ban iathuh eiei shaphang ia lade, ka Lanosha ka la pyrkhat “Tang shu bakla u Bah Malki un sa ngat ha ka shang khawiah ka Kongthei Daplin…”
Kumta hi ka phai ktien lem
“Haba kumta Kongthei ka mut lada jia ba wan tyrwa I Bah phin treh…” La buh jingkylli ka Lanosha
“Ngan treh beit…” La kren shai kdar ka Daplin
“Pha pat shu buh u kylli iapha phan leh kumno..” la kylli lem ka Daplin
“Nga te ngam dang pyrkhat shuwa ..” la jubab ka Lanosha
“Kumta mo… Tangba dang dei hi pha ba dang rit rta …” La kynthoh ka Kongthei
Kumta hi haba la poi noh ha iing ka Daplin ki shu ia khlad noh la ka jong ka jong ka lynti.
Ki ktien ba la ioh sngew na ka Kongthei Daplin ki la iai sawa ha ki jingmut jingpyrkhat ka Lanosha. Ha kata hi ka miet ka ioh ia kawei ka jingthoh na u Bah Malki ha la por mynmiet ka ba ong
“Hi… Gdnt..”
Kumjuh ka ruh ka la pynphai lem
“Same to you… Gdnt”
Kine ki jingthoh ki la pyni malu mala ia ka dur jong ka jing kynmaw ieid u Bah Malki ha ka jing mutdur ka Lanosha .
Katba ha ka Daplin pat kiei kiei ki jingiakren bad u Bah Malki ha dukan sha ki la sdang khring shibun ha ka jingmut jingpyrkhat jong ka. Marwei marwei ka la pyrshang ban thaw buit kumno ban ioh ia u number phone, ne ban ioh iakynduh bad u marwei. Hadien ba dep pyrkhat ia kine kiei kiei, ka la kut jingmut ruh ban pyrshang ban leit wad ia ka ophis ba u trei.
“Ngan sa leit it khnang noh ia ka jaka trei jong u ha kawei ka sngi…” La kren wei briew ka Daplin
Kumba ka thmu ha ka step jong ka sngi ka babud ka la leh shisha kumta. Ka Daplin ka la mih na iing ban leit sha D.C ophis kum kaba leit donkam. Hynrei ka thong ka long hi tang ban ioh iakynduh bad uta u briew uba ka la ithuh khmat. Kumta ynda ka la poi ha D.C Ophis ka la pyrshang ban pynshai la ki khmat shane bad shatai ban iohi ia u ta u Bah. Hynrei hangta ha kamra ba ka la rung kam shym la iohi satia ia u. Shipor ka la duh jingkyrmen, ka la mih noh ruh nangta bad ka la pyrshang ban pynshad la ki khmat sha phyllaw ophis ioh kumno re u don shata. Kumba da mang shisha u Bah Malki u iohi ia ka na surok katba u dang ieng kai. Kumta u tur shajan jong ka ban iakynduh
“Kongthei phi wan donkam ne…”u la kren
“Are I Bah phi trei hangne..”,leh myn kylli sa ka Kongthei
“Hooid kein…Nga sngew kumba nga la iathuh iaphi..” la phai ktien u Bah Malki
“O ngam kynmaw shuh..” la ong pat ka Daplin
“Phi donkam aiu Kongthei..” La kylli pat u Bah Malki
“,Nga mut ban wan pynleh S.T Certificate ia iwei I paralok..” la jubab ka Daplin
“O lah katta te Ito I kong I ba dei leh i la leit…” Iathuh u Bah Malki
“O ka te hab wan biang pat..” la kren bynniaw ka Kongthei
“Ale Kongthei ngin ia dihsha shuwa…” U Bah Malki u la khot iaka
Ka Kongthei ka la kmen palat ka mynsiem haba ka iohsngew ba u ong kumta.
“Ia kata shano…” Ka la leh myn kylli
“Hangthie don ka dukan ba kham bang…’ la ong u Bah Malki bad u ialam na khmat katba ka Kongthei ka nang bud na dien.[yn dang bteng]
|