Lah ban nym ioh, pynieng kyrtong ka BJP na Shillong

Shillong,17 Lber:
Haduh mynta ka Bharatya Janata Party (BJP) kam pat shym la pynbna ia ki kyrtong ki ba ia khun na katei ka seng ha kane ka elekshon MP Lok Sabha 2014 bad ka Shillong Seat ka dei kawei na ki konstitwensi kaba ka BJP kam pat shym la pynbna kyrtong. Ka tyllong khubor kaba la ioh na ki heh nongialam ka BJP ha kane ka jylla la ong ba ka BJP haduh mynta kam pat pynbna ruh la kan pynieng kyrtong ne kan kyrshan ia uno uno u kyrtong jong kano kano ka seng. Hynrei katkum ki lad khubor, la ong ba ka BJP ka lah ban ym pynieng kyrtong na Shillong ha kane ka

elekshon kaba mynta. Ki lad khubor ki la iathuh ruh ba u Myntri Rangbah ka Nagaland u Neiphiu Rio u la pyrshah jur ha Delhi ia ka BJP ba kan buh kyrtong hangne ha Shillong Parliamentary seat. Lah ban kdew ba baroh ki seng riewlum ki don ha ka juh ka sem hapoh ka NDA kynthup ia ka BJP. Lahr uh ban pynkynmaw ba dang myn ha ka sngi saitjain jong ka taiew u Myntri Rangbah ka Nagaland u la wan hangne ha nongbah Shillong ban ialap elekshon ia u Bah Paul Lyngdoh u kyrtong ka UDP. Na katei ka jingwan pyni u Rio ba u kyrshan ia u bah Paul ka lah ruh ban mih ka hukum na ka BJP sengkmie ia ka BJP ha ka jylla ban ai ka jingkyrshan ia utei u rangbah. Katkum ka khubor na ki heh BJP ka jylla la ong ba haduh mynta kim pat ioh kano kano ka jingtip na ka seng kmie ha kaba ia dei bad u kyrtong elekshon MP Lok Sabha 2014.
Ha kawei pat ka khubor, kaba la ioh na ki heh nongialam ka BJP ki la kyntait halor ka jingpynmih khubor kaba la ong ba ka BJP kan kyrshan ia u kyrtong ka UDP u bah Paul Lyngdoh ha kane ka elekshon MP ka ban sa long shen. Ka BJP ka la pynshai ruh ba haduh mynta kam pat rai halor ka elekshon MP bad ka la ong ruh ba kumba la pynmih khubor ka long ka bakla namarba jin lada ka dei ka rai ka seng kmie ruh ka seng kam lah ngeit namarba ka seng kmie kan ym shim ia ka rai khlem ka jingiasyllok bad ka state unit.