7 sngi, u heh CMJ ha ki pulit

Shillong, 17 Lber:
U Chief Judicial Magistrate (CJM) u P Joshi ha kane ka sngi Thohdieng u la hukum ba un shah tohkit ha ki pulit ia u Dhanwan Singh Ma tharoo hynniew sngi uba dei uba iajan bha bad u CM Jha. Ia u Matharoo un leit rah biang sha Kashari ha ka 20 tarik Lber.
Ka tnad CID ka la kem ia u Matharoo, uba dei u vice chancellor ka Apex Professional University, Itanagar ha ka 9 tarik Lber.
La kem ia u ha ka por ba u wan na Bangalore ha kane ka jylla hadien ba la shah khot hajir ha ki pulit CID.
Hynrei na ka liang ki pulit CID kim lah ban shim jingkylli ia u Matharoo namar la rah shah sumar ha Shillong Civil Hospital hadien ba la kem ia u, uba la ud pang.
Ka thymmei khubor ha kane ka sngi u Blei, ka iathuh ba u la pynlait noh na hospital ha ka 13 tarik Lber.
U Matharoo uba dei na Bangalore u la don bynta ban seng ia ki 531 tylli ki jaka pule ka CMJ university shabar ka jylla Meghalaya kaba pynkhein ia ki kyndon ka UGC bad ka rai ka Supreme Court.
Ka thymmei khubor ka iathuh ba u Matharoo uba dei uba iajan bha bad u CM Jha u la don bynta ban lum pisa na ki 7000 ngut eiei ki samla kiba pule ha ki jaka pule jong kane ka skulbah CMJ University.
“Ka pisa ba la ioh lum da u Matharoo ka la kot da ki klur”, la iathuh ka thymmei khubor.
La iathuh ba ki pulit CID ki la lap ia ki kam beain jong u Matharoo hadien ba la eksamin ia ki kot ki sla jong ki samla pule kiba la ioh kurup na kane ka skulbah.
“Ki pulit CID ki lah ban khot hajir biang ia ki nongtrei ba kham rit kiba trei ha ki jaka pule kane ka skulbah ha kane ka jylla”, la ong ka thymmei khubor.
“Ngin pan bor ban kem noh mardor ia u Matharoo”, la ong ka thymmei khubor na ka tnad pulit CID.
Lah ban kdew ba ha ka 7 tarik Lber, ka Supreme Court ka la weng ia ka jamin ba la ai sha u Chancellor ka CMJ University.
Ha ka 19 tarik Naitung mynshem snem, ka Supreme Court ka la ai jamin ia u CM Jha hadien ba la shah kyntait na ka High Court ka Meghalaya.
U nongsaid ain ka sorkar u Ranjan Mukherjee u la iathuh lyngba ka phun na Delhi ba ka la ujor ha ka Supreme Court ban weng noh ia ka jamin ba la ai ha u Jha.
Ha ka jingbishar ha 3 tarik Lber, Ka Court ka la pan ia ka jinglong jingman kane ka mukotduma na ka tnad CID.
Une u nongiasaid ain ka sorkar u la ti sha ka Kasheri ha kane ka sngi Thohdieng. Ka Supreme Court ka la sngew biang ia ka repod, la ong une u nongsaid ain ka sorkar.