Shillong: Ka Shillong Lajong kan iakhun mynta ka sngi pyrshah ia ka Minerva Punjab ha ka I-League 2018/19 ha madan Tau Devi Lal Stadium ha Chandigarh por 2PM. Ia ka jingialehkai yn pyni ha Hotstar bad Jio TV.
Ka Shillong Lajong ka la shah rem ha ka jingialehkai dang shen ha ka Real Kashmir FC bad ka la iakhaid ha ka jingiakhun bad ka Minerva mynshwa.
Ka Lajong ka don ha trai duh ka miej kamai point haduh mynta na ki 12 sien ialehkai, ka kamai tang 4 point.
U Coach u bah Alison Kharsyntiew u la ong ba ki nongialehkai ki la kham biang mynta khamtam ha ka jingiakhun pyrshah ia ka Real Kashmir hynrei ki sniew bok kim lah ban ioh ia ka jingjop.
“Kano kano ka jingialehkai ka long kaba donkam ia ngi bad nga ngeit ba ki nongialehkai kin ialehkai kham bha lashai ban ioh khur point”, u la ong.
Ka Minerva Punjab ka don ha ka kyrsan ba 7 ha kane ka I-League da kaba kamai 14 point. Ka la jop lai sien, iakhaid san sien bad ka la shah rem san sien haduh mynta. U coach ka Minerva Punjab u Paul Munster u la ong ba ki la ialehkai bha ki nongialehkai jongu hynrei ki la shah rem namar ba duna ka rukom pynleit jingmut.
U la kyrmen ba kin sa ioh khur ia ka lai point na ka jingialehkai ka sngi kaba dei ha jaka lajong ka kynhun.