ASSAM: KA BANGLADESH BA THYMMAI

Ricky Cooper Pathaw

Kum ka skum dkhiew kaba heh bad kaba syaid, ka jylla Assam ka la long ka ing shongneh bad shongbasa jong ki Nong Bangladesh bad nangne ki krih bad suhthied  sha ki Jylla Ba shatei la mihngi jong ka Ri India. Kiba bun ki mynder Bangladeshi ki wan sha India lyngba ka Assam bad nangne pat ki leit buhai sha kiwei pat ki jylla ka thain.Ynda la pynlong Ain ia ka Citizenship Amendment Bill (CAB), 2016, kane ka skum kan dang kham heh, kham khraw bad  khamskhem shibun shah, bad kane kan pynringsdot ym tang ia ka metbah hynrei wat ka mynsiem jong ka thain jongngi.

La saindur ia kane ka CAB, 2016 da ka jingthmu ban pyniar ia ki pud ki sam jong ka Hindutva bad ban pynroi ia ka parti BJP bad ka kynrad jongka, kata, ka RSS ; da kaba khein dewthala iaka jingsngew jongngi ki ritpaid kiba long ki Trai Muluk trai jaka. Lada ka Sorkar India ka kwah ban iarap ia kita ki ba shah pynshitom na ka daw niam ha Pakistan, Afghanistan bad Bangladesh, la ka long ki Hindu, ki Sikh, ki Khristan bad kiwei kiwei kumba ka CAB, 2016 ka pruid dak; ka lah ban iarap ia kiba kum kita ha ka rukom ba ki refugee kylleng ka pyrthei ki ioh jingiarap , hynrei ym da kaba knieh noh iaka hok long trai ki ritpaid ba la pynskhem da ka Riti synshar ka Ri India hynrei kane da khongpong kala thep ‘liewlep ia ki Riewlum. Kumno ka Sorkar India ka leh iaki Khristan ki ba iai shah pynshitom man ka sngi ha Ri India? Balei ka sngew synei tang ia kiba na Bangladesh? Kat kum ka jingkhein jong ka US Commission on International religious Freedom,2017(USCIRF) la buh ia ka India ha ka “Tier 2” ryngkat bad ka Iraq bad Afghanistan ha kata ka “Persecution severity” ne ka jing pynshitom bein ia ki Khristan. Kat kum kawei pat ka report jong ka ‘Open doors’ (World Watch List), ka India ka dei ka ba 10 ha pyrthei bad kaba 3 ha Asia hadien ka North Korea bad Pakistan kaba pynshitom bein ia ki Khristan bad ka Bangladesh pat ha ka kyrdan ba 48, la shu khein antad ba ha u 2016 ki Nongialam niam khristan ki shah shoh shah pynshitpm kumba 10 sien ha ka shitaiew. Ka Vishwa Hindu Parishad (VHP), RSS, Bajrang Dal ki dei ki kynhun kiba leh ia kane kiba dei ki para rit jong ka BJP. Te namar kata sangeh ka kren arsap! Ba synei khristan. Ka jingshah pynshitom ki Hindu ha Bangladesh ha u Snem 1990 kam dei ka daw jong ki Nong North-East, Hynrei dei ka daw jong ka Ayodhya Temple kaba ki Shit niam ha India, Uttar Pradesh bad ka RSS,VHP,Bajrang Dal bad ka BJP ki la pynkhih klong ia ki Muslim ha Bangladesh ki ba la mih ryngkat ki wait namar ba kiew ing khong haduh shynrong khlieh haba ki tip ba kine ki thmu ban pyn lko ia ka Masjid ban buh bujli da ka Ram Temple. Te balei ba ki Riewlum ha North-East kin long ki ‘lang knia na bynta ka shit niam ka jong ki?

Ka Jylla Assam naduh ki por ba Synshar Phareng bad haduh ka por ka thma India-Pakistan ban pynkha iaka Ri East Pakistan ne Bangladesh kumba ngi tip mynta, bad haduh mynta mynne la wan rung kyrthep da ki Mynder na Ri Banladesh kaba don ia ki khappud ba 262 Km ha shilynter jong ka bad ka Banladesh katba ka Meghalaya pat ka don 443 km  shilynter bad ka Bangladesh. Hapdeng u snem 1951-1961, U Myntri Rangbah ka Asssam ha kato ka por u ong ba don 10 lakh tam ki Mynder Pakistan (illegal Pakistani, Mynta Bangladesh) ki ba don ha India.

Balei ki nong Banladesh ki rung sha ki Jylla ka thain Shatei La mihngi?

Kane ka dei na ki katto  katne ki daw kiba ia snoh iwei ia iwei pat kum ka ioh ka kot (Economic), Ka jinglaitlan, ka jingjan (Environmental and geographical), Ka Sain Hima (Poilitical) bad kiwei kiwei. Hynrei ka daw nyngkong kaba pynlong ia ki khar Bangla ban tuid shane kam dei ka jingshah pynshitom namar ka niam hynrei ka dei ka ioh ka kot (Economic factor), Ka Banladesh kadei kawei na ki  Ri ba bun briew tam bad ba duk tam ha Pyrthei, ka don 163 million ngut ki briew,44.3 % ki long ki ba duk khoi (Absolute poor). Na kata ka daw ka Banladesh kadei kawei na ki Ri kaba soplai ia ki Nongtrei,ki Nongbylla (unskilled) ha ka dor kaba tad, hapdeng u snem 1976 bad 2002, palat 30 lak ngut ki Khar Banladesh ki mih na la ka jong ka Ri ban leit wad Bylla sha bar Ri (ym ba shah pynshitom namar ka niam), bad bun na kine ki poi ha Ri India bad kane ka jingwan ka dang bteng haduh mynta khlem kano kano ka jingwit ia ki. ( Lehse ha Meghalaya ruh namar ngi iohi bun ki Nongbylla Misteri, kuli shna ing , ki Nongtih dew iong, Nongshna Pandal bad kiwei kiwei kiba ki kyrteng bad ki niam ki sngew Bangla). Don kiba ngi iohi ha ki Khubor ba la shah kem bad pynphai noh, Hynrei sngap! Ka jing wad bniah da uwei u Professor  Dr. Amarjeet Singh, Institute for Defence studies and Analyses,u ong ba don kumba 15 million ki mynder ha Ri India bad la da ngi pynphai pat ia ki sha ka Ri jong ki (deportation) kumba ngi leh mynta kan shim por 1000 (Shihajar) snem iaka India ban pynphai lut ia ki. Mynta ha India don kumba 15 million ki Bangladeshi, 2.2 million ki Nepali,  shilak tam ki Tibetan bad kiwei kiwei, Kine ki don ha Meghalaya ruh. Ka report jong ka ‘Task force on  border Management’ August,2000 ka iathuh ba man la u snem 3 lak ki khar Bangla(illegal) ki rung sha India bad ki ba bun na ki ki rung sha Assam. La da 3 lak ki rung sha Meghalaya, ka mut shiphew snem, la kut! Kynmaw ba 60 snem mynshwa ka Tripura ka don 50 % ki Tribal, mynta  don sa 30 %, kaei phi iohi ia kane ka Jylla 60 snem hadien? Kumba ju leh ki khynnah College, hato la dei ka por ai Farewell noh? La da ka Citizenship Amendment Bill,2016 kam wan te ioh dang donlad da kumwei, hynrei te.

Ki Jylla ha North East bad ki khappud Bangladesh

Ka Assam ka ia soh bad ka Bangladesh lyngba ki khappud ba don 263 km, ka Meghalaya 443 km, ka Mizoram 318 km bad ka Tripura 856 km katba ka Nagaland, Arunachal, Manipur kam don khappud bad ka Bangladesh. Bad kine ki jylla baroh ki long ki ba duk bad ba duna briew ha ba ia nujor bad kiwei ki Jylla ha Ri India. Ha u snem 1961 la khein antad ha ka census ba 750000 ki khar Bangla ki rung ha Assam hapdeng u snem 1951-1961, kata hapoh 10 snem. Ka jingiakhih ba jur ka sdang ha u snem 1978 da ka All Asssam Student Union (AASU) ban phah weng ia ki kyrteng ki mynder na ka Voters’ list. Ha ka snem 1951-61 ka jingkiew ka jingdon briew (population) ha Assam ka long 34.98 % haba ia nujor bad ka jing kiew ba tang 21 % jong ka Ri India. Dang shen ka ing Bishar ba ha Khlieh duh (Supreme Court) ka la pdiang ia ka jingai case jong ka Assam Public Work (APW) kaba pyrshah ia ka jingdon jong 40 lakh ki mynder (illegal immigrants) ha ka thup kyrteng Nongthep vote (Voters’ list) ha Assam, bad ka APW kala dawa ban pyndam ia kine ki kyrteng baroh bad ban pynsangeh shwa iaka MLA elekshon 2011 tad haduh ban da weng shwa ia kine ki kyrteng.

Na Assam kine ki Khar Bangla ki tuid pat sha kiwei ki Jylla jong ka North East kum sha Mizoram, Nagaland, Arunachal, Manipur bad Meghalaya ban wad bylla. Ym tang ka bylla hynrei ki long ruh ki Nongkhaii. Ha Meghalaya ngim don ka jingkhein ba tikna katno ngut don ki Bangladeshi (illegal immigrant), Halor kane ka Nongrim ka Synjuk ki Seng Samla Shnong (SSSS) ka la kyrshan ia ka Sorkar ban shim khana samari ha ka National Population Register  (NPR) halor ka Nongrim baka NPR kan shim jingkhein ia ki Citizen bad Non-citizen khnang ba ngi lah ban tip katno ngut don ki Trai shnong ha u snem ba la shim jingkhein (base-year) ba yn lah pat ban sngewthuh  iaka jingkiew ne jinghiar ka jingbun briew , hynrei iakane la pyrshah da kotto katne kiwei pat ki seng. Haduh mynta ka Meghalaya kam don iaka jingkhein ba tikna ia kane.

Ban sngewthuh malu mala ia kane ngin phai sha ka Jylla Nagaland ka bym don ia u khappud bad ka Bangladesh hynrei kaba don pat ia u khappud bad ka Bangladesh ba Thymmai ( New Bangladesh) kumba la kdew ha ka kyrteng jong kane ka artkle.

Ka Nagaland ka ioh iaka nam ba roi stet bha ka jingbun briew hapoh shiphew snem (Decadal growth) ha Ri India naka 56.08 % ha u snem 1981-1991 sha ka 64.41% ha u snem 1991-2001. Bad ha ba bishar bha kane ka jingbun roi stet kam shym long salonsar iaka Jylla Nagaland baroh kawei hynrei ka Dimapur bad Wokha kaba don iaka khappud bad ka Assam ka roi stet bha, Ka Wokha ka jingroi stet ka long 95.01 % hapdeng u 1991-2001, bad ka dei kaba heh tam ka jingroi stet haba ia nujor bad ka jingroistet jong ki District ha baroh ka Ri India. Khlem jingartatien kane ka jingroi stet yn ym lah ban pynkha tang para Naga. Ha u snem 1999, U General secretary ka NSCN, U Thuingaleng Muivah u ong ba don kumba 200000 ngut ki Khar Bangla ha Dimapur. Ha u 2003 ka Sorkar Nagaland ka ong ba don 100000 ngut ki Khar Bangla ki basah ha Nagaland ba khappud bad ka Assam. Namar baka Nagaland kam donkhappud da ka dewbah ne lyngba ka wah ne duriaw, ki khar bangla ki rung sha Nagaland lyngba ka Assam bad haba ioh kem ia ki, ki ju pyni da ki EPIC, card Reshon, Laisen niah kali bad kiwei kiwei ki kot shna thok ban pynshisha ba ki dei ki Nong Assam. Ki Pulit wat la ki tip ba kim dei ki Assamese, ha ba ki ioh kem kim lah ban set along  namar ki don ia ki kot ban pynshisha ba ki shong ki sah ha Assam. Dei halor kane ba u Myntri Rangbah ka Nagaland u Neiphui Rio u ong “ Assam is the exporter of illegal immigrants to Nagaland”( Ka Jylla Assam ka dei ka Nongkhaii ia ki Mynder sha ka Jylla Nagaland) Bad ban pynshisha ia kane, ki don ki Report ha ka kot khubor Telegraph kaba iathuh ba ki Nongtrei Municipal jong ka Asssam ki ai ia ki kot pynshisha iaka jinglong trai jong ki ha Assam kum ki Birth certificates bad kiwei kiwei tang ha ka Dor Rs. 200 tyngka. Bad kane ka jingleh jong ki Nongtrei Sorkar ha Assam ka buh jingma iaka North-East hi baroh kawei. U ong ruh ba man ba ioh kem ia ki Bangladeshi ha Nagaland ki pyni ia ki kot ki sla ba ioh na Assam ba ki dei ki Trai Nongshong Shnong jong ka Ri India.

Kane ka jingrung kyrthep ki Mynder ha Nagaland ka bym don khappud bad ka Bangladesh hynrei kaba don ia ka ta ka Ain ILP bala mih naka  Bengal Eastern Frontier Regulation, 1873 ka la buh jing kylli ia ki ba bun ki Riew shemphang. Hato ka ILP ka iarap ban tehlakam iaka jingwan tuid ki briew ba nabar? U Neiphiu Rio ha ka 21/01/2019 u la ong baka Citizenship amendment Bill,2016 kan ym lah ban trei kam ha Nagaland namar la iada ia kane ka Jylla da ka Article 371 (a) jong ka Riti Synshar ka Ri India, kumba ha Meghalaya ruh la kam, ba iada, da kata ka Sixth Schedule, hato kane ka long ka jingshisha? La da kata ka Artikle 371 (a) ka iada ryngkat kata ka ILP ha Nagaland, Balei pat kane ka Jylla bym ia soh bad ka Bangladesh bun da ki Mynder khamtam ha Dimapur,Tuensang (78 %) bad Wokha kaba kiew stet tam ka jingroi briew hapoh 10 snem.(95.01 % decadal growth, 1991-2001) ka jingkiew stet ka jur ha Wokha bad Tuensang ban ia ka Dimapur bym don ILP. Jingshisha haba don ka ILP, wat ki nong India ruh kim ioh rung Laitlan. Ka jingwan tuid ki Mynder ha Nagaland ka la long naduh ki snem 1970 bad ka la nangkham kiew stet ha ki snem 1980 wat hapdeng ka jingdon jong ka ILP khamtam ha ki kappud ka Assam. La ngeit ba don ki jing dkoh ha ka ILP,kawei na ki jingdkoh dei ka bamsap, la da pynkham Rs.100, Rs 200 la lait ILP, khamtam naka Surokbah Dimapur-Kohima-Imphal.

Ka Khaii ka Pateng

Ha ba ngi phai pat sha ka khaii  ka pateng ka Jylla Nagaland ki Mynder (illegal) ne ki Bym dei ki Mynder hynrei ki bym dei ki Naga ki la ioh bat bun bha iaka khaii ka pateng.Ha kawei ka survey, 2006 ba la leh da ka Department of Evaluation Government of Nagaland, ba la wad bniah ha lai tylli ki District Dimapur, Mokuchung bad Kohima iaka ba la survey ia 13,380 tylli ki jait jing khaii/dukan. La lap ba ki Jaitbynriew bym dei Naga kiba kamai bad khaii ki don 48,815 ngut bad kine ki kamai Rs 450.60 crore ha ka shisnem. Bad kawei pat ka survey bala leh da ka Directorate of Agriculture ha u ha u snem 2003, ka iathuh ba na ki 23,777 tylli ki kam khaii,71.75 % na ki la long trai da ki Mynder. La iohi ruh ba ha Nagaland don ki dukan ba ai kyrteng Naga ha ka signboard hynrei ba la pyniaid pat da kiwei ki jaitbynriew. Iwei I Kolumnist ba paw, I Kong Patricia Mukhim ha u 2003, ha ka shithi (open letter) sha u Myntri Rangbah ka Nagaland I ong Kumne-

“It may not be too long before somebody with the power of numbers (population) demands a Union Territorial status in Dimapur. Its market areas already look like a mini-Bangladesh, albeit more lucrative.”

Ki Mynder ki suk ban ioh kam ha Nagaland namar ba ki trai muluk kim treh ban trei kam kiba ki khein ba kidei ki bapoh, kane ka pynlong ia ki mynder ban ioh kamai ba biang bad hapdeng katto katne bnai ba ki shongtrei, ki wan ialam lang ruh ia ki lok,ki khun bad ba haing hasem namar ba ka don ka lad ban ioh kamai. (Nagas are becoming increasingly dependent on the immigrants)

Ki Mynder Ha Meghalaya bad kumno ngin leh?

Haba ngi peit iaka Jylla Ngaland ka bym don pud don sam bad ka Bangladesh, ka jingdon jong ki Mynder bad ka jing bat jong ki iaka khaii ka pateng ka la I shyrkhei, wat la kim pat lah ban rai iaka Sain hima (politics) kum ha Assam. Ha ba ngi phai bad wad bniah pat ha Meghlaya kaba don ia u pud ba 400 km tam, ngim don ka jingkhein ba tikna, la shu tip na kawei ka report baha ki san snem kata 2008-2013 la ioh kem  18,951 ngut ki khar Bangla bad ba la pynphai pat ia ki. Hato kane ka jingpynphai pat (deportation) ka long kaba shisha? Ka “Operation Pushback” ba ki shipai India ki pynphai pat ia ki Nong Bangladesh ka la ia tyngkhuh bad ki BDR ne Bangladesh Rifle (shipai khappud) ha kaba kine ki la ong pynban ba kim dei ki Nong Bangladesh bad ka Myntri Rangbah ka Bangladesh ruh kam treh ia ki, kane ka operation Pushback ka la long thamula ha kaba katto katne ki ai Kyrteng sapmut da ka “Operation Push-in”

Ka Citizenship Amendment Bill, 2006 kan buh jingma shi katdei eh ia ki Jylla ka thain shatei la mih ngi,Khamtam ka Jylla Meghalaya kaba don ia u pud u ba jrongbha bad ka Bangladesh bad kumjuh ruh ka Bangladesh Ba thymmai (Assam). Kat kum ka Citizenship amendment Bill, ki mynder ki ba la sah 6 snem shwa u 2014 kin long Trai Ri noh, kane kan buh jingeh shibun iaka Jylla khamtam ia ki Mynder ba la sah ha Assam namar ki la lah ban pynshisha ia la de da ki Birth certificate thok ki ba ki shu thied Rs 200 tyngka naka Municipal, EPIC bad kiwei kiwei, kan kham jynjar khyndiat ia ki Nong Bangladesh hynrei ym dei pat ka bym lah long, namar ha ka pyrthei Bamsap ki Masi ruh ki rung thikthik da ki hajar na khappud, kan ym eh ia ki briew ba kin rung. Ngin leh Kumno? Ngin pyrshah tyngeh haduh ban da pynhap noh ia ka Citizenship Amendment Bill, 2016 bad ngi lah shuh shuh ban leh kumba la kdew harum ia ki lad ba ngi don mynta.

1. Katba dang don ka por, ki Nong North-East baroh kin hap ban ia snoh kti lang bad ki Nong Assam khnang ba kane ka skum ki Mynder kan ym heh da ka jingtheh um thiang ka Sorkar BJP na Parliament bad Ka Bangladesh ruh kan ym ioh shim kabu. Ha ba nga ong baroh kamut baroh Garo, Hynniewtrep, Nongtrei sorkar, Nongbylla, Skul, College, Kynthei, shynrang baroh ban pynsngew bad pyn kynmaw iaka jinglong kyrpang kumba la mut haba la pyrsad mynsiem iaka Sixth Schedule bad ka article 371 (a)ban ia da iaka rukom im bad ka kolshor tynrai jong ki Trai Muluk.Ngi dei ban long Kawei ka met, kawei ka mynsiem, kawei ka sur.

 

2. Ka jingai Trading Licence ka dei ban lait naka jingbam sap,Ka Sorkar Jylla kadei ban kyrshan pisa ia ki ADC ban buh pulit (enforcement) ki ba lah ban khynra man ka por ia ki trading Licence ha ki jaka khaii, ka KHADC, JHADC,GHADC kadei ban lait na ki jingbamsap, La da ki ADC ki bam sap kum ba long mynta, kan ym myntoi namar tang Rs 200 ioh lah ban ioh trading license. Dei ban don ki ain Pynshitom ia ki ba bamsap. Ki ain dei ban long ki ba khlain.

 

3. Dei ban don ka ‘ Legal advisers committee’ ka ban ai buit iaka EC ban pyntreikam pura ia kino kino ki ain ha ka sixth schedule ban teh lakam iaka iohkam ioh jam kiwei ki Jaitbynriew ki bym dei ki trai Muluk bad ban pynkhlain ia ki ain ha ki bynta ba don jingduna. Ki ADC kidei ban sangeh noh ban peit ialade kum ki ‘Footpath Department” na bynta ki paidbah. Dei ban pyrkhat thymmai.

 

4. Ki Sengbhalang bad Ka Sorkar ka dei ban shim nuksa bad bishar bniah na kiwei ki jylla halor ka jing phiel jong ki Ain iada kum ka ILP bad kiwei ki ain Influx, khnang ba yn lah ban pynkhlainbor bad ban pyndap ha ki jaka ba duna. Kawei naka report ha Nagaland ka iathuh baka ILP ka shu tip tang ki briew ba rung hynrei kam tip katno pat ki ba mih na kine ki ba rung.

 

5. Dei ban ai da ki temporary work permit ha ki jaka tih dewiong, construction bad kiwei kiwei ki jaka bylla kiba khring ia ki mynder

 

6. Dei ban pynshlur ia ki Nongwad bniah (Reserachers) ia ki Mynder ban bei pisa da ka sorkar. Dei ban don ka ‘Tracking system of immigrants’ ban bud bniah shano ki leit kiwan bad hangno ki sah.

 

7. Ki dukan ne ki Nongkhaii yn ym lah ban ai pateng, Ngim dei ban leh rain ban trei ia kano kano ka kam.

 

8. Ba ka Sorkar MDA kan wan rah iaka Whitepaper ha ing Dorbar Thaw-Ain ban lum jingkhein ia ki Trai Muluk, ban wad bniah ia ki daw kiba ktah mationg kiba long ki daw synjor jong ka jingteh lakam ia ka jingtuid ki mynder bad ban wad ia ka lynti ban pynkhlain ia ki lad iada.