Pyrshah u bah Process ba khein slum ia ka Mawlai

Shillong, 16 Lber :
U MDC ka Mawlai u Bah Process T Sawkmie u la pyrshah kaba jur halor ka jingkren jong ka Myntri ka tnad kam pynroi sor ka Kong Ampareen Lyngdoh ba ka Mawlai ka hap hapoh ka ‘Slum Area’.
Ka la dei ka por ba ka sorkar kan pyrkhat thymmai noh bad ban pynkynriah ia ka marten sha kiwei pat ki bynta kiba kham jngai na sor kiba dei ki jaka jong ka sorkar, la ong u Bah Sawkmie.
U Bah Sawkmie u la ong ba ka Mawlai kam dei satia ka slum namar ba ka don ka skul bah North Eastern Hill University (NEHU) kaba don hapoh Mawlai, ha kaba baroh ki nongpule jong ka thaiñ shatei lam-mihngi lem ki bynta jong ka Ri India ki wan ban pule hangne.
Ka don ruh ka Don Bosco ‘Museum’ ba la pyniaid da ki Phadar jong ka Balang Catholic nalor bun ka la pynmih ruh ia ki IAS ophisar kum Bah WMS Pariat bad Kong Charles Lamin bad kiwei kiwei de bad bun ki ophisar rangbah ki don hapoh Mawlai, la ong u Bah Sawkmie.
Utei u MDC ka Mawlai u la ong ki paidbah na sor bad khap sor ki kwah ban wan sha shang ha kine ki shnong namar ki dei ki shnong kiba bha, ba khuid bad kiba kiew sted ha ka liang ka roi ka par, kumta hato ka long mo kaba shongnia ban ong ba ka Mawlai ka hap hapoh ka ‘Slum Area’.
Na ka liang u Bah Sawkmie u kyrpad ia ka Myntri ba dei peit ia ka tnas kam pynroi sor ban ban pynbeit ia kane ka jingbakla hapoh ka ïingdorbar thawaiñ ka jylla.