Lada ka UDP ka pynkhyllem ia ka ARPA, ka hap ban ai jubab: KHNAM & HSPDP

Shillong, 16 Lber:
Ka KHNAM bad ka HSPDP ki la ong ba kim shym la babe eiei halor ka rai jongki ban kyrshan ia u kyrtong MP ka Common People’s Front (CMF) u Pastor PMB Basaiawmoit ha kane ka elekshon Lok Sabha na Shillong Parliamentary constituency, wat lada ka UDP kan weng noh ia ka kyrshan ia ka All Regional Parties Alliance (ARPA) ha KHADC.
‘Ka mat ba kongsan jong ngi ka long ban iada ia ka hok jong ki trai jaka trai muluk. Ngin nym iapein na ka bynta ka shuki ha kano kano ka rukom ruh,”, la ong u Working President ka KHNAM u Bah Adelbert Nongrum.
U Bah Nongrum u la ong ba ka jingneh ka ARPA ha KHADC ka dei ka mat kaba ar na ka bynta ka KHNAM namar ba ka buh ia ka jaitbynriew hakhmat.
“Ngim lah ban pyrkhat ia ka kabu shimet hynrei ngi ieng na ka bynta ka jaitbynriew. watla ka UDP kan weng noh na ka ARPA tang namar bym kyrshan ia u kyrtong jongka u Bah Paul Lyngdoh, ngim nym babe eiei namar ba ngi la rai ban kyrshan ia u Pastor Basaiawmoit”, la ong u Bah Nongrum.
U working president ka KHNAM u la ong ba lada ka UDP ka weng na ka ARPA, kan hap ban ai ia ka jubab sha ki paidbah.
Kumjuh ruh u nongialam ka HSPDP u MLA na Mawshynrut Bah Witting Mawsor u la ong ba ka HSPDP kam dei ka party ba thngan ia ka bor.
“Ngi la kut jingmut ban iasaid ia ka daw jong ka jaitbynriew ban iada na ka jingshah thombor. Ngi sngew ba ka jingrai ban kyrshan ia u Pastor Basaiawmoit kan nym don kano kano ka jingktah ha ka KHADC”, la ong u Bah Mawsor.
Hynrei ha kajuh ka por, u la ong ba ka party kan nym babe lada ka UDP kan khyllem ia ka ARPA.
Shwa ia kane, u president ka UDP u Dr Donkupar Roy u la pynthikna ba ka pary kan nym kwah ban pynkhyllem ia ka ARPA bad ka dei ban neh haduh ba kut ka san snem ha KHADC.
“Ngim nym weng ia ka jingkyrshan ia ka ARPA tang namar ba ka KHNAM bad ka HSPDP kim kyrshan ia u kyrtong jong ngi ha ka elekshon MP”, la ong u Dr Roy dang shen.