|
Nongpoh: Kawei ka longkmie kaba la tip kyrteng kum ka Kong Memora Dkhar (26) snem na ka shnong Nongthymmai 15mer, ka la khlad noh hadien ba ka la shah syllad ha kawei ka trok kaba don ia u number AS 01 JC 4329, ia kaba la niah da u Wanshwa Rabon, ka trok kaba wan ban kiew na Guahati sha Shillong.
La ioh jingtip ba katei ka jingjia ka la jia hynne ka step ha ka por 6:30 baje ei ei mynstep, ha kaba katei ka longkmie kaba dang mut ban kam na shilliang sha shillang jong katei ka surok NH-6 ha katei hi ka shnong, ka la kynduh ia katei ka apot tad haduh ba kan da khlad noh na sla pyrthei.
La ong ruh, ba ki paidbah kiba la sakhi ia katei ka jingjia, tang mar iohi ba katei ka longkmie kaba la shah syllad ha katei ka trok, ki la pyrshang ban ai jingiarap da kaba pynkit mar mar sha ka jaka sumar kaba don ha Byrnihat, hynrei ynda la poi ha katei ka jaka sumar, la pynbna ba katei ka longkmie ka la khlad noh.
Haba iadei bad katei ka jingjia, na ka liang ki pulit kin dang pynlong ia ka jingtohkit na ka bynta ban lap ia ka jingshisha baroh.
|