|
Nongpoh: Ki nongkitkam bad kiba dei ruh ki nongkyrshan ba radbah ka Party UDP ha Umroi Circle, ki la pynpaw ia ka jingpyrshah halor ka jingthmu ka UDP ba ai tiket ia u Bah F.D Ramsiej ban long kum u kyrtong MDC ha kane ka Ilekshon MDC ka ban sa long shen. Ha ka jingialang ba kyrkieh kaba la long hynnin ka sngi Saitjain ha ophis treikam ka Party kaba don ha Bhoirymbong, ha kaba la wan ban iashimbyntalang da ki Dkhot ka Executive Committee ka UDP Umroi Circle bad ha katei ka jingialang, ki la shim ruh ia ka rai ban phah da ka jingthoh sha u President ba Rangbah ka UDP, na ka bynta ban pynpaw ia ka jingpyrshah kaba jur halor ka jingthmu ai Tiket sha u Bah F.D Ramsiej. La ong ba ka daw hi kaba la pynlong ia ki nongkitkam ka Umroi Circle ban pyrshah halor katei ka jingthmu ai Tiket sha u Bah Ramsiej, ka dei hadien ba ki la lap ba utei u rangbah u la pynkhein ia ki mat treikam bad leh pyrshah ruh ia ka Party, kata ha ka Ilekshon MLA mynshem snem. Kitei ki nongkitakam ka Umroi Circle, ki la ong ba ka jingwanphai biang u Bah F.D ramsiej, kam shem la pynkhlain ia ka party, hynrei ka nang pynjot pynpra pynban ia ka Party. Kumta kitei ki nongialam kiba kynthup ia u Bah Shngainlang Thangkhiew, Vice-President, u Bah Martin Lyngdoh, Working President, u Bah Amberlight Masharing, Publicity Secretary, ki la ong ba ki hun bad kin ai ka jingkyrshan kaba radbah lada ka Party kan ai ia ka tiket sha uno uno u nongpan tang ban lait na u Bah F.D Ramsiej bad lada ka Party hi kan ai sha u Bah F.D Ramsiej, la sngewthuh ba kitei ki rangbah kim kyrshan shuh ia ka Party UDP. |