Shillong: U Myntri Rangbah ka jylla u Conrad K Sangma u la pyllait ia ka Meghalaya CM Whatsapp na ka bynta ban plie ia ka rynsan ia ki paidbah ban pynsngew ia ki jingeh dairek sha u Myntri Rangbah.
Ki paidbah ki lah ban rejister ia u number 9436394363 na ka bynta ban ujor ban ai jingmut ia ki jingeh.
Ia kane ka app la pyllait mynta ka sngi ha Secretariat ha kaba u Conrad u la ong ba ka jingthmu ka long ban ai ka jingshakri sha ki nongkyndong ban long kum ka rynsan ba kin lah ban ujor lada don kano kano ka jingeh bad ka sorkar kan leh ia kaba lah khlem da pynslem.
“Kane ka dei ka jingpyrshang ka ophis u Myntri Rangbah ban pyniajan ia ki paidbah bad ka sorkar bad ki bor synshar. Kum ka nuksa, lada ki briew ki don jingeh ha ka jinglip ding, ki lah ban ujor bad ki bor ba dei peit kin pynbeit mar mar ia kaba dei ban leh”, la ong u Conrad.