Nongstoiñ: Ki dkhot jong ka seng KSU West Khasi Hills District, hapoh ka jingialam jong u samla Johnfisher Nongsiang President bad u Rishot Kharbani General Secretary mynta ka sngi ki la pynpaw ia ka jingpyrshah halor ka jingthmu jong ki bor pyniaid District ban pynlong ia ka jing bishar na ka bynta ka surok two lane na Nongstoiñ Sha Wahkaji bad Ranikor.
Ki-dkhot-bad-nongialam-ka-KSU-WKHD-kiba-dang-ia-tur-sha-ophis-u-DC-ka-WKHD.
Ki nongialam jong ka seng KSU ki la leit ruh ban tur sha ka ophis jong u DC ka West Khasi hills, ban pynpaw ia ka jingpyrshah, hynrei katba ki dkhot bad nongialam jong ka seng ki dang leit ban tur sha ophis u DC, na ka liang ki pulit ryngkat ki Magistrate ki la khang lynti noh ia ki ha shwa ba kin ioh rung ha khyrdop jong ka ophis u DC.
Hadien ba ki bor pyniaid District ki la khang lad noh, ki nongialam bad ki dkhot jong ka KSU, ki la la ieng ban pyndap samam ha khmat ka khyrdop jong ka ophis u DC da kaba ki la ia pyrta jam da ki kyntien ban pyrshah jur ia katei ka jingthmu ban pynlong ia katei ka jingiakren paidbah, ha kaba iadei bad katei ka surok bad ki la pynpaw ruh ba ka dei ka buit jong ka sorkar tang ban ioh tih ia u Uranium.
Shuh shuh hadien ba ki bor pulit bad ki Magistrate ki la ia pynbeit bad ki nongialam jong ka KSU, la shah ruh ia ki tang kumba 6 ngut ba kin leit ia kynduh ia u Deputy Commissioner u bah T. Lyngwa na ka bynta ban iakren halor katei ka kam.
Haba iakren sha ki lad pathai khubor hadien ka jingiakynduh ia u DC, na ka liang jong u samla Johnfisher Nongsiang u la ong ba ha katei ka jingiakynduh bad u DC na ka liang jong ka seng ka pynpaw ia ka jingpyrshah halor ka jingkhot pynlong jing iakren paidbah, da ka District Administration ha kaba iadei bad ka surok Nongstoiñ- Wahkaji- Ranikor, namar haduh mynta hi ki paidbah kim pat sngewthuh bha ha kaba iadei bad katei ka surok two lane.
Shuh shuh u la ong ruh ba na ka liang jong u DC hadien ba la dep ban iakren bad ki nongialam jong ka seng u la ong ba un sa ai ia ka jingthoh sha ka sorkar ha kaba iadei bad katei ka jingpyrshah jong ka seng bad u DC, u la ong ruh ba un sa ai ia ka jingpyntip sha ki nongialam jong ka seng hadien ba un da ioh ia ka jubab bad ka rai na ka sorkar.
“Ngi kwah ba ka sorkar kan pynsangeh noh shwa ia kane ka hearing namar kane ka surok kumba ngi tip baroh shi katta kadei beit ka surok ba don jingiadei bad ka jingthmu tih Uranium, bad ka sorkar kadei ban pynsangeh shwa ia kane namar katba kam pat thaw wat ia ka committee jong ki sengbhalang, Rangbah Shnong, MLA bad kiwei ban iakren halor katei ka mat bad lada ka sorkar kam lah ban rai bad kan pynlong ia ka hearing, ngi long kiba la khreh ban leit pyrshah sha ka jaka pynlong ia katei ka hearing” ong u Samla John Fisher Nongsiang.
Katba na ka liang jong u DC, u la pyntip ba u la ioh ia ka jingbthah na ka sorkar ba katei ka jing iakren paidbah kan iaid beit kumta na ka liang jong u ruh, un hap ban pyniaid sha khmat ia katei ka kam.
Haba iakren pat bad ki nongialam ka Synjuk Nongsynshar Shnong jong ka thaiñ Lai Lyngdoh lyngba ka telephone ki la ong ba ki pdiang ia katei ka jingiakren paidbah, khnang ban ioh ia ka jingbishar ba hok la ki paidbah ki pdiang ne kyrngah ia katei ka surok ar laiñ ba la wan lyngba ka sorkar kmie.