Shillong: Ki bor District jong ka East Jaintia Hills ki la khang ia ki nongthohkhubor ban tur shajan ka krem dewiong kaba don ha Ksan kaba ki bor iarap ki dang ia khun ban sei ia ki metiap napoh katei ka krem. U myntri sorkar uba peit ia ka tnad Revenue and Disaster Management u bah Kyrmen Shylla u laong ba la pyntip sha u ba la khang ia ki nongthohkhubor ban leit shajan katei ka krem namarba ki pynthud ia ki bor iarap kiba dang treikam hangtei da kaba leit interbiw khah khah manla ka khyndiat minit.
Katba u President jong ka Shillong Press Club u bah David Laitphlang u la ong ba u la ia kren bad u myntri rangbah ka jylla u Conrad K Sangma bym dei ban khang ia ki nongthohkhubor khnang ba kin ioh ia ka jingtip kaba tikna ba kin sam sha ki paidbah. U la ong ba ki bor district kim dei ban buhrieh ia ka jingjia hangtei hynrei ki dei ban ai ka jingiatreilang bad ki nongthohkhubor.
Ka MLA na ka seng Congress ka kong Ampareen Lyngdoh ka la ong ba ka sorkar ka dei ban shim ia ka jingkitkhlieh ban ai jingtip sha ki nongthohkhubor ia ka jinglong jingman jong ka kam hangtei khnang ba ki paidbah kin ioh ka jingtip kaba shai. Lah ban kdew na 15 ngut ki briew ki la shah tap hapoh ka krem dewiong ha Ksan naduh ka 13 tarik u nohprah bad haduh mynta ki kynhun iarap bapher ki dang ia khun ban sei ia ki metiap kiba sahkut hapoh.