Shillong: Ka jingiaknieh tiket na ka seng Congress na ka bynta ka elekshon MP 2019 na Shillong bad Tura Parliamentary konstitwensi ka jur bha. Na Shillong ka jingiaknieh mynta ka long hapdeng u MP ba mynta u Vincent H Pala bad u MLA barim ka Sohiong u bah HDR Lyngdoh katba ha Tura pat ka jingiaknieh tiket ka long hapdeng ka MLA barim ka Williamnagar ka Deborah Marak bad u MLA ba mynta u Zenith Sangma.
Na ka bynta ka Tura kiba bun ki MLA Congress ki kwah ban pyniakhun da u nongialam ka Liang Pyrshah u Dr.Mukul Sangma bad la ong ba ka jingiakren hapoh ka Congress ban pyniakhun da u Dr.Mukul ka dang iaid shakhmat. Ka MLA jong ka East Shillong ka kong Ampareen Lyngdoh ka la pynpaw ba ka kwah ba u Dr.Mukul un ia khun hi ha katei ka elekshon MP Lok Sabha na Tura bad ka la ong ba dei tang u Mukul u kandidet uba biang tam ban ia khun ia katei ka elekshon.
Lah ban kdew ba baroh 3 ngut u Dr.Mukul, Zenith bad ka Deborah ki dei kiba la iakhun teng ia ka elekshon MP na Tura hynrei ki la rem. U Dr.Mukul u la shah rem ha u Purno A Sangma ha u snem 2004 hynrei hadien u Purno u la risaiñ na ka kam MP ban wan phai biang sha ka politik ha ka jylla bad ha u 2008 ka la long ka elekshon shiteng samoi bad ka Congress ka la pynieng da u Zenith hynrei u la shah rem noh ha ka Agatha K Sangma bad ha ka elekshon MP 2009 ka Congress ka la pynieng da ka Deborah Marak hynrei ka Deborah ruh ka la shah rem ha ka Agatha. Ha u 2014 pat ka Congress ka la pynieng da u Daryl William Ch Momin hynrei utei ruh u la shah rem ha u P urno. Ha ka elekshon shiteng samoi ha u 2016 hadien ba la khlad noh u Purno , ka Congress ka la pynieng da ka lok jong u Dr.Mukul ka Dikanchi D Shira hynrei katei ruh ka la shah rem ha u Conrad.