Shillong: Ka Shillong Lajong FC ka la shah rem biang ha ka Real Kashmir da 0-1 kol ha ka jingiakhun kaba long ha kane ka sngi Saitjain ha JN Stadium Polo, Shillong.
Ka nam rem ia ka Lajong ka la wan na ka kol jong u Aaron Katabe ha ka 74 minit hadien ba u la ïoh ba un pyndei da ka khlieh ïa ka bol kaba la wan lyngba ka kornar.
Kane ka jingshah rem ka Lajong ka la long ka sien kaba ar ha ka jingiakhun ha ka lympung I – League.
Kane ka dei kawei pat ka jingiaid lynti kaba sniew bok ia ka Lajong kaba shah rem lynter ha kane ka lympung bad ka don mynta ha trai duh ban kamai point. Ka Lajong ka la kamai tang 4 point na ki 12 sien ki jingialehkai haduh mynta.
Na ka liang u Alison Kharsyntiew ula wanrah ïa ka jingkylla biang ha ka kynhun hadien ba u Phurba Tempa Lachenpa, u Phrangki Buam bad u Lalawmpuia Hnamte ki la wan ban mih bujli ha ka jaka ka jong u Neithovilie Chalieu, Samuel Lalmuanpuia bad u Sheen Sohktung.
Haba pynshong nongrim ia kaba kut jong ka jingialehkai ha kane ka janmiet, ka kren shai kdar ba ka dei ka janmiet kaba ka kynhun ialehkai ka SLFC ka la kyntiew bha ia la ka rukom ïalehkai ka jong ka, ha kajuh ka por ba kan lah ruh ban pyrshang her sted bha ia ka rukom ialehkai ka jong ka, ne ban lah wat ban khanglad ïa ka Real Kashmir ban nym ïoh lad da kaba suk ban pynkhih ïa ka jar.
Ha kane ka jingialehkai, ka kylla step ka la kut noh shwa ha ka jingbym don satia ba lah ban ïa pynkhih ia ka jar.
Haba wan ban ïa bteng ia ka kylla miet, ki ar kynhun kiba la sngew skhem bha kata ka rukom ialehkai ka jong ki bad kiba la lap bad iohi ia ki jingduna bad tlot, ba ka pynlong ia kane ka jingiakhun ba kan kham itynnad bha, da ka jinglah ban mih paw jong ka jingpyrshang ban ia pynkhih ia ka jar tad haduh ka khyllipmat kaba u Katebe u la ïoh ban thep ia kane ka shi kol.