Sngap mynthi U Mukul:Dr Don

Shillong, 10 Lber:
U nongialam liang pyrshah ha iing dorbar u Dr Donkupar Roy u la ther ia ka jinglong mynthi jong u myntri rangbah u Mukul Sangma u bym sngap ia ka jingai jingmut jong ki MLA.
‘Nga la thoh sha u Myntri rangbah ban bhah pisa lem na ka bynta ki kam pynroi ha ka constituency lyngba ka Special Plan Assistance (SPA). Hynrei ngam ju ioh pdiang kano kano ka jubab na u haduh mynta”, la ong u Dr Roy uba dei u MLA ka UDP haba kren mynta ka sngi, ha ka iing dorbar halor ka jingiatai halor ka jingkren jong u Lat.
U la ong ba baroh ki myntri rangbah ha ki snem ba la dep, ki ju jubab lada thoh kum ia kane kaba long ka jingmyntoi ia ki paidbah ym ia ka shimet.
U Dr Roy u la ong ba ka jinglong jong une u myntri rangbah ba mynta ka long ka bym sngew iahap namar ba u sngap mynthi.
“Nga pan ia kane na ka bynta ka roi ka par jong ka constituency,” la ong u Dr Roy.
U la ong ba kam mut ba ka Shella constituency ka don tang ki nongkyrshan ka UDP, ki don ruh bun bah ki nongkyrshan ka Congress.
“La don bun bah ki nongkyrshan ka Congress ha ka constituency,” la ong u nongialam ka UDP bad u la pynpaw ia ka jingsngew lyngngoh haba ia ka jingtyrwa jongu ban bhah ia ka skhim, la kyntait bad leh da u myntri rangbah.