Shillong: Ka Shillong Lajong kan iakhun mynta ka sngi pyrshah ia ka Real Kashmir ha JN Stadium, Shillong por 5PM jong ka Hero I-League 2018/19.
Ia ki tiket lah ban ioh na SSA Counter ha Polo naduh ka por 10 am.
Ka Shillong Lajong haduh mynta kam shym la lah ban thaw pyrthei ha kane ka lumpung ha kaba ka la shah rem lut jan baroh ki jingialehkai bad ka don mynta ha trai duh ka miej iakhein ha kane ka lumpung.
Ha ka jingialehkai ba la dep, ka Lajong ka la shah rem haka Real Kashmir da 1-6 kol.
Ha ka jingiakhun ha la iing, ka la jop tang ia ka Aizawl bad ka iakhaid bad ka Minerva Punjab hynrei ka la shah rem lynter.
Ka Lajong ka kamai haduh mynta tang 4 point na ki 12 sien ialehkai katba ka Real Kashmir FC ka la don ha ka kyrdan balai da kaba kamai 22 point, ha kaba ka la jop 6 sien, iakhaid saw, bad ka shah rem ar sien.
Kumba ka paw, ka lynti iaid ka Shillong Lajong ha kane ka I-league mynta ka samoi, kam dei kaba sngew tynnad namar ba ka la don hapdeng ka jingeh bad ka jingma.
Ka daw kaba kongsan eh ba ka Lajong ka la tlot ka dei namar ka jingbym don ki nongialehkai nabar ri kumba long ha ki snem ba la dep namar ba mynta ka la sei tang bad ki nongialehkai na kane ka jylla bad kiba na ka thain.