Kyntu ki Khlieh Nongsynshar ia 58 ngut ki MDC ban pynjanai ia ki ain ha ADC

Shillong, 9 Lber:
Ka Dorbar ki Khlieh Nongsynshar Grand Council of Chiefs of Meghalaya ( kaba kynthup ia ka Federation of Khasi States, Ka Dorbar Ki Khlieh Nongsynshar Ka Ri Hynniewtrep, Ka Dorbar Ki Dolloi, & Council of Nokmas) ka la ai khublei ia ki nongbat kam ba thymmai ka KHADC bad JHADC ba kynthup naduh ka Kong Teilinia Thangkhiew, Chairperson, KHADC, u Bah Ardent M Basaiawmoit, Chief Executive Member(CEM) KHADC, u Bah Pyniaid Sing Syiem, MDC, Deputy Chairman, KHADC, bad ia u Ma Laitsing Shylla, MDC Chairman, JHADC, Ma Thombor Shiwat, MDC, Chief Executive Member, (CEM) JHADC, kiba la shah jied dang shen kum ki nongpyniaid jong ka Khasi bad Jaintia Hills Autonomous District Council. U Bah John F Kharshiing, Chairman Ka Dorbar Ki Khlieh Nongsynshar Ka Ri Hynniewtrep, Spokesperson, Federation of Khasi States, ha ka kyrteng ki Khlieh Nongsynshar ka bri Hynniewtrep, u la ai khublei kumjuh ia baroh sanphew phra (58) ngut ki MDC KHADC (29) bad JHADC(29).
Ha ka juh ka por na ka liang ka Dorbar ki la kyntu jur ia baroh 58 ngut ki MDC kiba la shah jied hapoh JHADC bad KHADC ba kin thaw lad ban pynjanai ia ki ain khamtam jong ki 53 + 1 tylli ki Hima/Elaka, ha Khasi Hills bad 18 +1 Elaka ha Jaintia Hills, kiban long ka stieh ia ki khun ki hajar ha kane ka juk kaba mynta ha kaba ki ia kren beit tang da ki Ain bad ki Rule.