Shillong,9 Lber:
Ka All Regional Party Alliance (ARPA) ka kynhun ba ioh ia ka bor synshar ha KHADC kaba kynthup ia baroh ki seng riewlum ka UDP,HSPDP,KHNAM ka lah ban pra noh tang hadien ka elekshon MP, kat kum ki lad khubor ba la ioh lum la ioh jingtip ba ka rai la ka ARPA kan neh ne kan hap noh dei tang hadien ka elekshon MP Lok Sabha. Ka daw kaba la pynap shrip ia ka ARPA ka dei la ka HSPDP bad ka KHNAM kiba la pynbna ba kin ai ka jingkyrshan ia u kyrtong ka PCF u Pastor Basaiawmoit katba mynta pat ka UDP kaba don lang ha katei ka kynhun ka la pan jingkyrshan na baroh ki seng riewlum ban kyrshan ia u kyrtong jong ka u bah Paul Lyngdoh.
Kumba ka long mynta ka UDP ka donlang ha ka ARPA bad haba phai sha ki san snem ba la dep ka la ia donlang bad ka seng Congress hapoh ka KHUDA haduh ban da kut ki san snem. Lada jia ba ki seng riewlum kim ai ka jingkyrshan ia u kyrtong ka UDP ha kane ka elekshon MP kumba ki la
pynbna ba kin kyrshan ia u Pastor Basaiawmoit, ka UDP ka lah ban phet noh na ki seng riewlum bad ka lah ban pyniasoh sha ka seng Congress. Ka ARPA haduh mynta ka don 17 ngut ki MDC bad 6 ngut ki dei na ka UDP bad lada jia ba ka UDP kan phet noh ka ARPA kan sah sa tang 11 ngut kaba mut ka la duh ia ka jingbun paid.
Phi don ban ong eiei?