Ioh bhah baroh ka HSPDP, duh 1 na ka KHNAM , iatan ka UDP

Shillong,9 Lber:
Baroh ki MDC kiba dang shu shah jied na ka seng HSPDP, ki la ioh lut ia ka bhah ha ka EC ba thymmai jong ka KHADC hapoh ka jingialam jong u bah Ardent Basaiawmoit kum u Chief Executive Memeber hynrei tang uwei na ki un duh bhah. La iohi ba ka HSPDP ka la bat ia ka kam Chairman bad Deputy Chairman kumjuh ruh ka kam CEM kata lai ngut ki MDC jong ka ki la ioh bhah. Katkum ka jingteh jong kitei ki seng riewlum kiba don hapoh ka ARPA ka HSPDP ka dei ban don 4 ngut ki EM , ka KHNAM 3 ngut bad ka UDP 4 ngut. Kumba long haduh mynta sa lai ngut ki MDC ka HSPDP ki bym pat ioh bhah, hynrei katkum ka jingiateh uwei napdeng jong ki u lah ban duh noh ia ka bhah bad kat kum ka tyllong khubor la iathuh na ka HSPDP ki ban ioh long EM ki long ka kong Grace Mary Kharpuri, u bah L.G Nongsiej bad u bah P.K Pangniang . Ka KHNAM kaba don saw ngut ki MDC ka ioh tang 3 ngut ban long EM, katkum ki lad khubor la ioh jingtip ba ka na ka KHNAM u bah James Ban Basaiawmoit u lah ban duh ia katei ka bhah , bad ka seng ka lah ban ai sha u bah Process T Sawkmie, u bah Adilbert Nongrum bad u bah Latiplang Kharkongor.
Ka UDP kaba don 6 ngut ki MDC ka don ia ka bhah ban ioh long EM haduh 4 ngut bad ka hap ban pynshong noh ia 2 ngut ki MDC jong ka, haduh mynta ym shym la ioh jingtip iano ka UDP kan ai ia kitei ki 4 tylli ki EM, hynrei katkum ki lad khubor la iathuh ba ka don bha ka jingiatan tyllai kaba jur hapdeng ki MDC UDP ban ioh ia ka shuki EM. La iathuh ba ka UDP, ka kwah ban pynrung shuki EM, ia U Bah Teinwell Dkhar, kum U Deputy CEM, nangta ia kiwei de kiba dang shu jop MDC, kum ka kong Rona Khymdeit, Bah Don Sumer bad U bah Hadrian Lyngdoh; ha kaba ki la mynjur ruh ba ki MLA, kiba long MDC, kim dei satia ban kwah shuki EM eiei satia, katba ha kine ki sngi, la iathuh ba U bah Brol Nongsiej, u kwah bha ba un ioh rung ialade kum U Executive Member ha katei ka EC ha KHADC.