Shillong:Ki sengbhalang na Garo Hills, ha ka lama jong ka All Garo Hills Joint Action Committee (AGHJAC), kin pynlong ia ka jingshong kyrain lashai ka Sngi, ha khmat ka ophis U Deputy Commissioner, West Garo Hills ha Tura, kum ka dak jong ka jingsngew pyrshah jongki ia ka Citizenship Amendment Bill (CAB). La iathuh ba katei ka jingshong kyrain, kan sdang ha ka por 10baje mynstep bad kan kut ha ka por 3baje nohsngi.
La iathuh ba ki sengbhalang bapher jong ka Garo hills, ki la ia kynduh lang ha Chisobibra, hajan Williamnagar ha ka Lah Sngi U Blei, ha kaba ki la mynjur ban thaw ia ka kynhun synrop jong ki sengbhalang bad ban pyrshah ia katei ka ain jong ka sorkar India.